08 июля 2009 г.
Хăватлă трактор-комбайна, ытти агрегатсене кăтартма, вĕсем мĕнле ĕçленипе паллаштарма, çитменлĕхĕсемпе лайăх енĕсене пĕлме районта республика шайĕнчи «Хир кунĕ-2009» курав иртрĕ, вăл икĕ куна тăсăлчĕ. Унта ЧР Министрсен Кабинечĕн Председателĕн çумĕ – Ял хуçалăх министрĕ М. Игнатьев, ЧР Президент Администрацийĕн пĕрремĕш çумĕ, организаци ĕçĕсен управлени начальникĕ В. Тимофеев, район пуçлăхĕ Н. Глухов, ЧР Президент советникĕ – «Малалла» ял хуçалăх артель ертÿçи М. Петров, «Труд» хуçалăх ертÿçи Н. Михайлов, республикăри район пуçлăхĕсем, хуçалăх ертÿçисем, тĕрлĕ компани представителĕсем хутшăнчĕç.
Уява Ял хуçалăх министрĕ М. Игнатьев уçрĕ, куравăн тĕп шухăшĕпе, республика çитĕнĕвĕсемпе паллаштарчĕ. Ун хыççăн район пуçлăхĕ Н. Глухов сăмах илчĕ. Юхмапа Пăла тăрăхĕнче пурăнакансем Чăваш Ен Президенчĕ лартнă тĕллеве, пĕрер миллион тонна тырăпа çĕр улми туса илессине пурнăçа кĕртме тăрăшнине асăнчĕ. Унтан «Малалла» артель ертÿçи М. Петров калаçрĕ. Хăватлă техника ял хуçалăхĕнче пысăк вырăн йышăннине, анчах туянма укçа-тенкĕрен йывăртараххине палăртрĕ. Илнĕ трактор-машинăн хакĕн пĕр пайне субсидилесен çăмăлрах пулассине палăртрĕ. «Труд» хуçалăх ертÿçи Н. Михайлов хăйсен ĕçĕ-хĕлĕ пирки чарăнса тăчĕ.
«Труд» хуçалăхăн хирĕнче йĕркипе вырнаçтарса лартнă техникăсем аякранах курăнса лараççĕ. Патнереххĕн пырсассăн тĕлĕнмеллипех тĕлĕнетĕн. Хамăрăн тата кÿршĕ, ют çĕр-шывсенче туса кăларнă 80-а яхăн трактор-комбайн, кăкарса çÿремелли агрегатсем патĕнче çынсем чылайччен тĕпчевлĕн сăнарĕç. Хăшĕсене халиччен курманран пушшех те кăсăклă пулчĕ. Кунта пысăк хуçалăхсен хирĕнче ĕçлекен техникăран пуçласа уйрăм хуçалăхра усă кураканнисем валли таранах пур.
Пĕр харăс пилĕк ĕç тăвакан, çĕр улми пуçтаракан, утта е улăма вĕтетекен агрегатсем нумайăшне интереслентерчĕç. Комбайнсем тата епле хăватлă! Механизаторсем кабинăсенче тусан çăтса лармаççĕ: кондиционер пур. Кăмăлу пулсан музыка е çĕнĕ хыпар итле.
Пысăк та сарлака кустăрмаллă тракторсем анана хытарманни тÿрех паллă. Вĕсем хăйсен мăнаçлăхĕпе такамăн кăмăлне те çавăрĕç. Акă, JОНN Deere-6820 «хурçă ут» шăпах çавăн пеккисен йышне кĕрет. Шел пулин те, районта хальлĕхе кун пеккисем çук. Çывăх вăхăтра пирĕн уйсенче те курасса шанас килет.
Кăмăл тăвакансем çакăнтах «Чăвашагролизинг», «Чăвашагрокомплект», «Агротехкомплект», «Белпро-Сервис, «Агротрейтинг» компанисен представителĕсемпе хăйсене килĕшнĕ «хурçă ута» туянма килĕшÿ тума та пултарчĕç.
Ял хуçалăх техникин куравĕ пирки хăш-пĕр хуçалăх ертÿçисем хăйсен шухăшĕсене те палăртрĕç.
П. Никифоров, «Красное знамя» хуçалăх ертÿçи:
– Çакăн пек курав йĕркелени питĕ лайăх. Кунта кăтартнă техникăсем перспективлисен шутĕнче, чылайăшĕ пирĕн районта та пур. Тухăçа ÿстерес тесен малашне çаксемпе ĕçлемелле.
Л. Кузнецов, «Звезда» хуçалăх ертÿçи:
– Çыннăн паянхи кунпа мар, ыранхипе пурăнмалла, çавăнпа кун пек меро-прияти кирлĕ. Кунта тăратнă техникăсене курни хăй мĕне тăрать, вĕсене туянас кăмăл çуралать. Çакăн пек вырăнта тата пĕр-пĕрин опычĕпе, шухăшĕпе паллашатпăр, ку та усăллă.
Курава хутшăнакансем выставкăри техникăсем мĕнле ĕçленине те курса хаклама пултарчĕç. Шăпах çапла туни чылайăшне татăклă утăм тума май пачĕ.
«Хир кунĕ» уява килнисем «Труд» тата «Малалла» хуçалăхсен хирĕсемпе паллашрĕç, вĕсен ĕç опы-чĕпе интересленчĕç.
Ял хуçалăх техникин куравĕ уявран та уяв пулчĕ. Мероприятие хутшăнакансем Патăрьелĕнчи культурăпа кану центрĕ, «Шуçăм» фольклор ушкăнĕ хатĕрленĕ концерта пăхса савăнчĕç.
Сухаçăсен ăмăртăвĕ Иккĕмĕш кун
Июлĕн 3-мĕшĕнче «Труд» хуçалăхăн хирĕнче иртекен «Хир кунĕ-2009» техника куравĕ малалла тăсăлчĕ. Шăпах çак кун республикăри сухаçăсен ăмăртăвĕ те пулчĕ. Тĕрлĕ районти 15 механизатор, вĕсенчен пĕри конкурссăр, ĕçри пултарулăхне кăтартрĕç. Пирĕн районтан «Труд» кооперативри О. Исаев тата професси училищинче вĕренекен Ф. Пуня хутшăнчĕç.
Шăпа ярса хăш лаптăка сухаламаллине суйласа илнĕ хыççăн трактористсене ЧР Ял хуçалăх министрĕн çумĕ С. Павлов, район пуçлăхĕ Н. Глухов, Чăваш Енри тĕп патшалăх Гостехнадзор инженер-инспекторĕ – инспекци начальникĕ В. Димитриев, «Труд» хуçалăх ертÿçи Н. Михайлов ăнăçусем сунчĕç, чи маттурри çĕнтерессе шаннине пĕлтерчĕç.
Акнă е лартнă культура тухăçĕ мĕнле пуласси сухаçăран та нумай килет. Технологине пăхăнса сухаланă лаптăка хуть хăçан та пăхма кăмăллă. Çакна тĕпе хурса ăмăртăва хакларĕç судьясем.
Палăртнă вырăна тракторсене илсе пырса лартнă хыççăн механизаторсем хăйсене шаннă техникăна тепĕр хут тĕрĕслерĕç. Судьясем ирĕк панă хыççăн ĕçе пуçăнчĕç. Пĕрремĕш хутĕнче трактористсем çĕре купаласа сухаланине (всвал) кăтартрĕç. Пирĕн район тракторисчĕн пултарулăхне судьясем лайăх хак пачĕç, технологине пăсманнине пĕлтерчĕç. Иккĕмĕш хутĕнче çĕре уйăрса хăпартса (развал) сухаларĕç. Кайран палăртнă лаптăка йăлтах хуратрĕç. Тÿресем шăйрăксем пуррипе çуккине тĕрĕслерĕç, унтан пĕтĕм-летрĕç. Кашни механизатор пысăк пахалăхпа сухалама тăрăшрĕ, анчах чи маттуррисем çĕнтерÿçĕ ятне çĕнсе илчĕç. Пĕрремĕш вырăна Елчĕк районĕнчи «Сатурн» хуçалăхра вăй хуракан В. Лисицын йышăнчĕ. Иккĕмĕшĕнче – Комсомольски районĕнчи «Слава картофелю» хуçалăх механизаторĕ Г. Миронов. Виççĕмĕш вырăна пирĕн районти «Труд» кооператив тракторисчĕ О. Исаев тата В. Арманов йышăнчĕç. Çавăн пекех «Чи çамрăк механизатор» ятне Муркаш каччи Р. Толикин, «Техника лару-тăрăвĕпе чи лайăх агрегат» номинацине Йĕпреçри Н. Захаров тивĕçрĕç. Çĕнтерÿçĕсене диплом тата хаклă парне парса чысларĕç.
«Хир кунĕ-2009» курава йĕркелесе ирттерсе яма пулăшнăшăн Ял хуçалăх министрĕн çумĕ С. Павлов пурне те тав турĕ. Ял хуçалăх министерствин Тав çырăвне район пуçлăхĕ Н. Глухов, унăн çумĕ, АПК предприятийĕсемпе хутшăну йĕркелекен пай начальникĕ М. Калмыков, «Труд» тата «Малалла» хуçалăх ертÿçисем, дилер компани ертÿçисем тивĕçрĕç.
О. ПАВЛОВА.