08 июля 2009 г.
Коллективпа пуçтарăнса юбиляра саламланă чухне çак юрра шăрантарчĕç «Звезда» кооперативри сысна фермин ĕçченĕсем. З. Кузнецовăна çирĕп сывлăх, телей, ăнăçу сунса сумлă парне кÿчĕç. Савăнăçне пытараймарĕ Зоя Ивановна. Ĕçре, юлташĕсен хушшинче хăйне телейлĕ туять те вăл. Савăнăçа, хуйха-суйха коллективпа пайлама май пулнишĕн хĕпĕртет. Лайăххи те, япăххи те сахал мар пулать пурнăçра. Юлташĕсен ырă канашĕсем ăна тĕксĕм шухăшсене сирсе яма пулăшаççех.
Ĕçрен ÿркенмест хĕрарăм. Качча килнĕренпех утать вăл кооператива. Ачисем пĕчĕкрех чухне уй-хир бригадине çÿренĕ. Сухан-севок, выльăх кăшманĕн пайĕсене илнĕ. Каярахпа ферма çул тытнă. Малтан ĕне фермине сукмак хывнă.
– Хăнăхиччен çăмăлах пулмарĕ. Н. Солдатова, Л. Киргизова дояркăсем, А. Кузнецова техник-лаборант вĕрентсе пынипе йывăрлăха парăнмарăм. Хама çирĕплетсе панă ушкăнран палăртнă сăвăма илеттĕм. Ĕнесене пĕтĕлентерсе хăварасси те хамăр çинчехчĕ, – аса илет З. Кузнецова.
Килĕнчен ĕçе çÿреме инçе марччĕ. 10-15 минут утсанах çитме пулать. Çуллахи лагере велосипедпа каятчĕ. Ачисем ыйхăран вăраниччен ирхи сăвăма вĕçлесе килме те ĕлкĕретчĕ Зоя. Сашăпа Людьăна малтанласа асламăшĕ пăхрĕ. Вĕсем аталанса çитнĕ çĕре ватти хăй хавшарĕ. Кĕçĕнни Таня вара ялти садика çÿрерĕ.
Мăшăрĕпе чухне хуçалăхри ĕçсене те кал-кал пурнăçлама пулатчĕ. Анчах кĕтмен инкек ăна ураран ÿкерчĕ. Вырăнпа самаях выртнă хыççăн пурнăçран уйрăлчĕ Петя. Çавăнтанпа хуçалăха тытса пырасси йăлтах Зоя Ивановна çине тиенчĕ.
Иртет иккен кун çул, килмест каялла. Саша çар ретĕнче пулчĕ. Пĕвĕпе аш-шĕнчен те иртейрĕ вăл. Люда та ялти шкултан вĕренсе тухнă хыççăн пĕлĕвне малалла тăсать. Таня кăçал çиччĕмĕш класа кайма хатĕрленет.
Мăшăрĕ чирлĕ чухне фермăран пăрахма тÿр килнĕччĕ Зойăна. Анчах В. Щукина тĕп зоотехник хуйха ĕçпе пусарма май пулнине çирĕплетмешкĕн ăна сысна фермине вырнаçма сĕнчĕ. Унта ĕçе те ирпе ирех каймалла мар. Каçхине те сĕм çĕрлене юлмастăн. Хирĕçлемерĕ çакна З. Кузнецова. Валентина Александровнăна вăхăтра сĕнÿ панăшăн калаçура ырăпа çеç аса илсе тăрать.
Кăмăлне хăйĕнне те хурлаймастăн Зоя Ивановнăнне. Иккĕмĕш мăшăр пулса килнĕччĕ вăл яла. Малтанхи арăмĕ пĕр ывăлпа уйрăлнăччĕ. Юрий кĕçĕн шăллĕпе йăмăкĕсем патне килсех çÿрет. Унăн çем-йине кучченеçсĕр ăсатмасть З. Кузнецова.
Çĕр çинче ырă çынсем нумаййишĕн хĕпĕртет Зоя. Сысна ферминче те сахалăн мар вĕсем. З. Плешкова заведующи çынна ăнланма пĕлекенскер. Г. Суркова, сысна амисем пăхаканскер, ĕç вăрттăнлăхне вĕрентме ÿркенместех. Зоя Ивановнăна 30 тĕп, 15 тĕрĕслемелли ама çирĕплетсе панă. Кăçалхи 5 уйăхра вĕсенчен 226 çура илме пултарнă вăл.
Юлташсем пулсассăн пурăнма аван теççĕ. Çакна çур ĕмĕрхи юбилейра тепĕр хут çирĕплетрĕ Зоя.
А. АСТРАХАНЦЕВА.