15 июля 2009 г.
Шупашкар хулинче Пĕтĕм Раççейри ялти спортсменсен вăййисем пулса иртрĕç. Ăмăртăва пурĕ 16 регионтан пуçтарăннă. Çуран хăвăрт утакансен тупăшăвĕнче пирĕн районти Треньел хĕрĕ Ирина Юманова та ăмăртрĕ. Ирина стартранах чи вăйлисемпе «ерсе» кайрĕ. Çаврăм хыççăн çаврăм тунă май, хăйне лайăх туйса юлашкинчен мала ыткăнчĕ, финиш йĕрне пĕрремĕш çитсе чемпионка ятне тивĕçрĕ. Ирина 2007-2008 çулсенче пысăк çитĕнÿсем тунине спорта юратакансем ас тăваççĕ ĕнтĕ, çапах та тепĕр хут аса илни ытлашши пулмасть пуль тетĕп. 2007 çулта Европăра мала тухмалли ăмăртура, тĕнче чемпионатĕнче, 2008 çулта Тĕнче кубокне çĕнсе илмелли ăмăртура иккĕмĕш вырăнсене тухса юниоркăсен хушшинче Тĕнче кубокĕн хуçи пулса тăчĕ. Çакăн пек пысăк çитĕнÿсем тума çамрăк хĕр ачана, паллах, çăмăл пулман. Кăçалхи стартсем Иринăшăн ăнăçлах пулманччĕ-ха, çапах та пуçа усмарĕ. Хальхи вăхăтра Ирина Альбина Павловна Семенова тренер патĕнче ăсталăха туптать. Спортăн çак енĕпе пирĕн республикăри Семенов тренерсен çемйи тахçантанпах палăрса тăрать. Василий, Геннадий, Виктор, Альбина тренерсем пысăк шайри спорт мастерĕсем миçе хатĕрлемен пуль; Вĕсен шутĕнче пирĕн Ирина Юманова та.
Çывăх вăхăтра Пенза хулинче Раççей Кубокне çĕнсе илессишĕн пысăк ăмăртусем пулмалла. Унта Ирина призлă вырăна çĕнсе илессишĕн тупăшĕ. Халь вĕсем ăна хатĕрленме пуçланă.
В. БОРОДКИН,
спорт ветеранĕ.