18 июля 2009 г.
Раççей Федерацийĕн Вĕрентÿ тата наука министрĕ А. Фурсенко Раççейри 2009 çулхи чи лайăх 10000 учителе укçан хавхалантарасси çинчен палăртакан приказа алă пуснă.
Чăваш Енрен çак чыса 110 вĕрентекен тивĕçнĕ. Вĕсен йышĕнче Сăкăтри вăтам шкулта тутар чĕлхипе литературине вĕрентекен Фердания Шайхулловна Ахмадеева, Первомайскинчи Митта Ваçлейĕ ячĕллĕ вĕрентÿ центрĕнче пуçламăш классене вĕрентекен Людмила Васильевна Николаева тата Тутар Сăкăтри вăтам шкулти биологи предметне вĕрентекен Гельнур Нурулловна Сабитова пурри уйрăмах савăнтарать.
Учительсен кунĕ тĕлне вĕсем кашниех 100-шер пин тенкĕллĕ пулĕç тата Раççей Федерацийĕн Вĕрентÿ тата наука министерствин Хисеп грамотине тивĕçĕç.
«Вĕрентÿ» наци проектне пурнăçа кĕртнĕ май 2006–2008 çулсенче Чăваш Енри мĕнпур учительсен 10 проценчĕ çак конкурса хутшăннă. Вĕсенчен 336-шĕ Раççей шайĕнчи хавхалантарăва, 90 педагог Чăваш Ен Президенчĕн грантне илнĕ.
А. ИВАНОВ.