18 июля 2009 г.
Тыр-пул пиçе пуçларĕ, кĕрхисен тĕшши хытмалли кăна юлнă. Часах хирсем техника шавĕпе тепĕр хут тулĕç. Унччен комбайн-сене юсаса çитерсе ĕçе юрăхлă тумалла. Районти хуçалăхсенче 83 «уй-хир карапĕ» шутланса тăрать, вĕсенчен 72-шĕ уя тухма пултараççĕ. Хальхи вăхăтра палăртнă графикпа килĕшÿллĕн ятарлă комисси кашни хуçалăха çитсе комбайнсене тĕрĕслет, ĕçлеме кайма пултарнине ĕнентерекен документ парать.
Акă, «Малалла», «Батыревский», «Труд», Ленин ячĕллĕ хуçалăхсенче комбайнсене маларах юсама пуçăннă, çавăнпа та вĕсенче чăрмавсем ытлашши пулмĕç.
«Батыревский» хупă акционерла пĕрлешÿре вырмана «Дон-1500Б» – 3, «Енисей» пĕрре хутшăнмалла. Пурне те юсаса пĕтернĕпе пĕрех, хăш-пĕр кăлтăка сирмелли кăна юлнă. Кадрсем тĕлĕшĕнчен те йывăрлăхсем çук. Кашни комбайнерăн пулăшуçи пур. Акă, Н. Викторов Александр ывăлĕпе, Г. Арланов А. Арлановпа, В. Капитонов Валентин ятлă ачипе, В. Краснов С. Николаевпа пулса çитнĕ тыр-пула пухса кĕртĕç. Механизаторсем «карапсене» хăйсемех юсанă. Кашни комбайна çĕнĕ аптечкăпа, огнетушительпе, кĕреçепе тивĕçтернĕ. Çунтармалли-сĕрмелли материал çителĕклĕ, нумай пулмасть çеç 60 тонна турттарса килнĕ.
Пĕрлешÿре професси училищинче вĕренекенсене ĕçе явăçтарассипе те лайăх тимлеççĕ. Е. Васильевпа И. Терентьев практикантсем мĕн вĕреннине çуллахи вăхăтра ĕçре çирĕплетеççĕ.
Техника çĕнелсе пынă май механизаторсен пĕлĕвне тарăнлатассипе те тимлĕх уйăрмалла. Шел пулин те, ку пур хуçалăхра та пулса пымасть. Кăçал Ленин ячĕллĕ агрофирмăра тата «Батыревский» пĕрлешÿре вăй хуракан комбайнерсем кăна вĕренÿре пулнă.
«Гвардеец» тата «Родина» хуçалăхсенче те ятарлă комисси пулчĕ. Иккĕшĕнче те комбайнсене юсама пуçăнман. Пĕтĕм вăя выльăх апачĕ хатĕрленĕ çĕре янăран ĕçе тытăнманнине пĕлтерчĕç.
«Комбайн» операци вăхăтĕнче «уй-хир карап» хуçисем çителĕксĕртереххи, ку ыйтупа ытларах тимлемелли палăрчĕ. Çавăн пекех комбайнсене те юсаса пĕтерсе ĕçе тухма юрăхлине ĕнентерекен документа пур хуçалăхăн та илмелле, кирлĕ хатĕрсемпе тивĕçтермелле. Çанталăк шăрăх тăнă вăхăтра хирте пушар тухас хăрушлăх пысăк, огнетушитель, кĕреçе кашни комбайнăн пулмалла.
А. ДУМИЛИН,
Гостехнадзор инспекцийĕн районти аслă инспекторĕ.
И. ВАСИЛЬЕВ,
АПК предприятийĕсемпе хутшăну йĕркелекен пай специалисчĕ.
О. ПАВЛОВА,
хаçат сотрудникĕ.