18 июля 2009 г.
Нумай пулмасть çеç райхаçатра Пăлапуç Пашьелĕнчи пĕр çул çитмен ача районти преступлени «рекорд-сменĕ» пулнă пирки çырнăччĕ. Райадминистраци çумĕнчи çул çитменнисен комиссийĕнче çак ялти тепĕр паттăр пирки ĕç пăхса тухнă. Вун çиччĕри ача тăваттăмĕш хут çакланнă çак комиссине. Пуринче те пĕр сăлтавпа – обществăлла вырăнта эрех ĕçсе хăйне тытма пĕлменшĕн.
Çак çамрăк вун пилĕк çултах эрех-сăра, чикарккă енне туртăннă-мĕн. Черчен организма çав наркăмăшсем халех парăнтарма пултарни питĕ пăшăрхантарать. Арçын ача районти тĕп больницăри наркологи кабинетĕнче те, çул çитменнисен инспекцийĕн хура списокĕнче те тăрать.