22 июля 2009 г.
Районти суд приставĕн коллективĕ пысăк мар. Кунта ĕçлекенсем хăйсен професси шайне ÿстерес, ĕç кăтартăвне, пахалăхне лайăхлатас тесе тимлеççĕ. Иртнĕ çулхи ĕç кăтартăвĕпе, сăмахран, В. Хвостова «Республикăри чи лайăх суд при ставĕн исполнителĕ» хисеплĕ ята, Г. Иванова суд приставĕн исполнителĕ 2008 çулхи ĕç кăтартăвĕпе «Тава тивĕçлĕ ĕçсемшĕн» медаль илме тивĕçнĕ.
Кăçал вара коллектившăн тепĕр пысăк савăнăç пулчĕ. Районти «Акатуй-Сабантуйра» И. Яковлева пристав-исполнителе, депозитлă счетсене кĕртес енĕпе ĕçлекен тĕп специалиста «Районти чи лайăх финансист» хисеплĕ ят пачĕç. Çак чыс, хисеп Ирина Николаевнăна ĕçре тата хастартарах пулма, ăна пысăк яваплăхпа пурнăçлама хистĕ.
Яковлевсен çемйи ыттисемшĕн кăтартуллă, ырă тĕслĕхлĕ. Ирина Николаевнăпа Александр Васильевич хĕрпе ывăл çитĕнтереççĕ. Вĕсем иккĕшĕ те амăшĕн професси çулне суйланă. Катя юрист специальноçне алла илнĕ, Канашри суд приставĕн пай пуçлăхĕнче тăрăшать, çемьеллĕ. Василий те юридика факультетĕнченех вĕренсе тухнă, предприниматель.
– Район шайĕнче çак хисеплĕ ята эпĕ пĕччен тăрăшса çĕнсе илмен. Ку вăл пирĕн коллективăн пĕрлехи çитĕнĕвĕ тесе шутлатăп, – терĕ Ирина Николаевна хăйне çапла чыс тунăшăн тав туса.
А. ЕГОРОВА.