25 июля 2009 г.
Райадминистраци çумĕнчи санэпидемкомиссин черетлĕ ларăвĕ суту-илÿ предприятийĕсенче санитари законодательствине мĕнле пăхăнни çинчен ыйту пăхса тухрĕ.
Кун йĕркинчи темăпа калаçмалли пурах. Суту-илÿпе ĕçлекен уйрăм çынсем те сахал мар, вĕсемпе тупăшса вăй хурас, райпо лавккисене халăха ытларах уттарас тесен вара йĕркене çирĕп пăхăнни кирлех. Сентре умĕнче сутă тунисĕр пуçне туса çитереймен ĕç сахал мар. Патăрьелĕнчи «Ромашка», «Самообслуживание» лавккисене, Турханти столовăя, буфета, Анат Тăрмăшĕнчи куллен кирлĕ таварсем сутакан лавккана шыв кĕртнĕ, хура шыв тухассине тунă. Анчах ыттисене çак ырлăх çитеймен. Лавкка умĕнчи чечек акса ÿстермелли лаптăка тирпейлеменнисем пур. Тикешри, Еншикри, Вăрманхĕрри Шăхалĕнчи, Козловка-Пăлакассинчи, Хирти Пикшикри, Туçари куллен кирлĕ таварсем тата апат-çимĕç сутакан лавккасем умĕнчи картасем хуçăлнă.
Нăрваш Шăхалĕнчи лавккара маччари плитасем хăпăнкаланă, урай хăмисем уçăлнă. Склад стенисем кăвакарнă. Шăхачри куллен кирлĕ таварсем сутакан лавккара та лару-тăру чаплах мар. Турханти, Первомайскинчи столовăйсенче те çитменлĕхсем пур. Çĕнĕ Ахпÿрт лавккинче стена çурăлнă. Хăш-пĕр ялсенчи суту-илÿ лавккисене апат-çимĕçе тавар туянакансем кĕрсе çÿрекен алăкранах пушатаççĕ. Сăкăтри, Хирти Пикшикри, Ыхра Çырминчи, Красномайскри, Вăрманхĕрри Шăхалĕнчи, Упамсари, Треньелĕнчи, Вăтаелĕнчи, Шăхачри, Турханти лавккасенче апат-çимĕç продукчĕсене упрамалли условисене пăхăнмаççĕ. Срокран тухнă япаласене сутасси те тĕл пулать. Тĕрĕсленĕ чухне «йогурта», сыра, «Ласка» торта, кăлпассине, маргарина пăрахăçлама сĕннĕ. Тавара хăçанччен сутма юранине кăтартакан этикеткăсене çырма ÿркенмелле марах. Хăш-пĕр лавккасенче пăта виçекен тараса çинчех апат-çимĕçе виçсе чĕркеççĕ.
Нăрваш Шăхалĕнчи, Каншелĕнчи, Аслă Чементи, Первомайскинчи, Сăкăтри, Вăтаелĕнчи, Ыхра Çырминчи, Сителĕнчи, Треньелĕнчи, Туçари лавккасенче, буфетра çимелли тавар урайĕнчех выртать. Айне хумалли хатĕрсем çук.
Термометрсăр холодильниклĕ лавккасем пур. Витрина çинчи тусана шăлса тасатмаллине те асра тытмаллах, çĕмрĕк умывальниксенче те шыв тăратаймăн.
Ют çĕр-шывра кăларнă таварсем çинче вырăсла чĕлхепе çырни пулмалла. Китайсен ача-пăча тетти вара пĕр лавккана унсăрăнах çитнĕ. Çакă та потребительсен правине хÿтĕлессине хирĕçлет.
Т. Антонова предпринимателĕн «Рябинушка» лавккинче те апат-çимĕçе упрамалли йĕркене пăснă тĕслĕхсем тупса палăртнă. «Йолдыз» суту-илÿ çуртĕнче те санитарипе гигиена йĕрки тивĕçтермест.
Тупса палăртнă çитменлĕхсене пĕтерес енĕпе тунă ĕçсемпе райпо представителĕ И. Тупикина паллаштарчĕ. Лавккасен заведующийĕсемпе апат-çимĕçе упрамалли йĕркесене аса илтерсе калаçу ирттернине палăртрĕ. Срокран иртнĕ таварсене пăрахăçа кăларнине пĕлтерчĕ. Хушма тараса туянса лавккасене панă. Таварсен айне хумалли япаласем (подтоварник) ăсталанă. Дезинфекци хатĕрĕсемпе тивĕçтернĕ тата ытти те.
Комисси членĕсен ыйтăвĕсем те пулчĕç. Клиентсемпе ĕçлекенсен яланах сăпайлă, тирпейлĕ, тимлĕ пулмаллине палăртрĕç вĕсем. Тĕрĕслев пуласса пĕлсе тăрсах хăш-пĕр çитменлĕхĕсене маларах пĕтерме те май пулнах-тăр. Çакна палăртрĕ юлашкинчен ларăва ертсе пынă «Роспотребнадзор» управленийĕн республикăри территори пайĕн районти начальникĕ Н. Сергеева. Тĕрĕслев итогĕсемпе айăплисене явап тыттарса тивĕçлĕ штраф тÿлеттернине пĕлтерчĕ.
А. ИВАНОВА.