25 июля 2009 г.
Чăтма çук шăрăх çу кунĕсем тăраççĕ. Кун пек чухне хăйăр çинче те çăмарта пиçет теççĕ. Ача-пăча вара шыв хĕррине туртăнать. Кунĕпех чăмпăлтатма та хатĕр хăшĕсем. Кĕçĕнреххисем аслисем хыççăн тарăн шыва та кĕме шикленмеççĕ. Ушкăнпа шыва кĕнĕ чухне пĕр-пĕрне асăрхама та кансĕр. Çитменнине çыранран сикмелле е ишсе ăмăртмалла выляма юратаççĕ. Камăн мала тухас килмест; Шывăн турачĕ çук та авăр тĕлĕ хăй тĕлĕнчен хăпăтасшăнах мар. Иртнĕ канмалли кун районта пĕр ачан пурнăçĕ татăлчĕ. Çавăнпа та асăрхануллă пулмаллах.
Медицина. Приоритетный национальный проект «Здоровье»
Çынсен пурнăçĕшĕн тăрăшса
Ку чухнехи медицина эмел хатĕрĕсенчен пуян, çапах та йывăррисене юн препарачĕсемпе усă курмасăр та сиплеме çук. Больницăсенче çителĕклĕ юн пултăр тесе ирттереççĕ Донор кунĕсене. Тÿлевсĕр юн парасси, унпа чирлĕ çын пурнăçне çăлма пулăшасси кашни сывлăхлин тивĕçĕ теме те пулать. Çакна тĕрĕс ăнланакансем сахалăн мар. Июлĕн 21-мĕшĕнче ку тĕлĕшпе районти тĕп больницăра ирттернĕ ыркăмăллăх акцине 123 çын хутшăнчĕ. Донор кунĕнче уйрăмах медицина ĕçченĕсем хастарлăх кăтартрĕç. 37 çын юн пачĕ. Шурă халатлисем шăпах пурнăçпа кĕрешекен çын шăпи юн ярса тытăнса юлма пултарнине лайăх ăнланаççĕ ĕнтĕ.
Çак кун Канашри юн илекен станци ĕçченĕсем 49 литр юн пуçтарнине ырламаллах.