08 августа 2009 г.
Велосипедистсем шоссе çинче чупса Чăваш Республикин кубокне çĕнсе илессишĕн, çавăнпа пĕрлех велосипед спорчĕн тăватă енĕпе СССР спорт мастерĕн, çак ялта çуралса ÿснĕ В. Мулендеевăн призĕсене тивĕçессишĕн, пиртен вăхăтсăр уйрăлса кайнă СССР спорт мастерне Н. Ильина – Тукмакова асăнса Нăрваш Шăхалĕнче сумлă ăмăртусем пулса иртрĕç. Ăмăрту парадĕнче спортсменсене ăмăртусем еплерех йĕркепе иртессипе паллаштарчĕç. Велосипедистсене Нăрваш Шăхаль ял поселенийĕн пуçлăхĕ Н. Яковлев, Чăваш Республикин Президенчĕн Администрацийĕн пай ертÿçи, хамăр ентеш Ю. Исаев, Чăваш Республикинчи велосипед спорчĕн федерацийĕн президенчĕ Э. Павлов, Чăваш Республикинчи йĕлтĕр спорчĕн аслă тренерĕ Н. Николаев саламларĕç, çирĕп сывлăх, ăнăçу сунчĕç.
Малтанхи кун велосипедистсем уйрăмшарăн чупса тупăшрĕç. Чи çамрăккисем 5 çухрăмлă дистанцире вăй виçрĕç. Малтан кĕтнĕ пекех чи вăйли Д. Прокопьев (Шупашкар, В. Ярды ячĕллĕ велошкул) пулчĕ. Иккĕмĕш вырăнта С. Сергеев (Вăрмар), виççĕмĕш – В. Афанасьев (Н. Шăхаль). Çак çулхи хĕр ачасем те çак хушăрах ăмăртрĕç. Чи пултарулли Çĕнĕ Шупашкар хĕр ачи Н. Моложина пулчĕ. Иккĕмĕш вырăнта С. Михайлова (Н. Шăхаль).
1995-1996 çулсенче çуралнисем 10 çухрăмлă хушăра ăмăртрĕç. Ăна чи хăвăрт вĕçлекенни А. Краснов (Шупашкарти В. Ярды ячĕллĕ велошкул). Иккĕмĕшпе виççĕмĕш вăхăт А. Белянцевпа (В.Ярды ячĕллĕ велошкул) М. Емельянов (Çĕньял) кăтартрĕç. Хĕр ачасенчен чи пултарулли велоспортра чи пысăк шанчăк паракан Вăрманхĕрри Шăхаль хĕрĕ, хальхи вăхăтра Шупашкарти Олимп резервĕсем хатĕрлекен шкулта вĕренекен О. Терентьева пулчĕ, Н. Шăхаль хĕрĕ А. Михайлова – иккĕмĕш.
1993-1994 çулсенче çуралнисем 15 çухрăмлă дистанцире тупăшрĕç. Ăна чи лайăх вăхăтпа А. Александров (Çĕнĕ Шупашкар) вĕçлерĕ. Унăн командăри юлташĕ Н. Антонов иккĕмĕш, виççĕмĕшĕнче Вăрманхĕрри Шăхалĕнчи Е. Григорьев. Женя та хальхи вăхăтра Олимп резервĕсем хатĕрлекен училищĕре вĕренет. Хĕр ачасенчен çĕнтерÿçĕ – А. Тарасова (Ярды ячĕллĕ велошкул). Юлташ хĕрĕ И. Портнова иккĕмĕш вырăнта, виççĕмĕшĕнче М. Филиппова (Вăрманхĕрри Шăхаль – Олимп резервĕсем хатĕрлекен училище).
Аслă çулхи хĕр ачасенчен малтан кĕтнĕ пекех Пекинри Олимп вăййисене хутшăннă В. Андреева пĕрремĕш вырăн йышăнчĕ. Унăн командăри юлташĕсем Н. Катушкинăпа Э. Петрова иккĕмĕшпе виççĕмĕш вырăнсенче. Аслă çулхи арçын ачасемпе çамрăксем чи вăрăм, 25 çухрăмлă хушăра тупăшрĕç. Ушкăнра пурте тенĕ пекех спорт мастерĕсем е спорт мастерĕн кандидачĕсем. Çак çăмăл мар дистанцире Шупашкарти В. Ярды ячĕллĕ велошкулти Д. Яковлев чемпион ятне çĕнсе илчĕ. И. Тимофеев (Вăрмар) иккĕмĕш вырăнта, Н. Зайцев (Казахстан) виççĕмĕшĕнче. Сăмах май каласан, Казахстан çĕр-шывĕнчи велосипедистсем кашни çулах чылай вăхăт хушши Шупашкара килсе тренировкăсем ирттереççĕ, тĕрлĕ ăмăртусене хутшăнаççĕ. Арçынсенчен çак хушша чи хăвăрт В. Романов (Ярды ячĕллĕ велошкул) вĕçлерĕ. Унăн командăри юлташĕ П. Денисов иккĕмĕш вăхăт кăтартрĕ, виççĕмĕш вырăнта – В. Павлов (Шупашкар).
Çапла вара пĕрремĕш кунхи ăмăртусенче мала тухнă тата призлă вырăнсене çĕнсе илнĕ спортсменсем Валерий Андреевич Мулендеев парнисене тивĕçрĕç. Валерий Андреевич хальхи вăхăтра Шупашкарти Олимп тата Тĕнче чемпионĕ В. Ярды ячĕллĕ 7-мĕш велошкулăн директорĕнче вăй хурать.
Иккĕмĕш кунне велосипедистсем Н. Ильин-Тукмакова асăнса стартран ушкăнпа хускалса кайса унăн ячĕпе хисепленекен призсене çĕнсе илессишĕн тупăшрĕç. Чи кĕçĕннисем 5 çухрăмлă дистанцире тупăшрĕç. Малтан кĕтнĕ пекех дистанцие чи малтан Д. Прокопьев вĕçлерĕ, чемпион ятне иккĕмĕш хут çĕнсе илчĕ. Иккĕмĕш вырăнта – В. Афанасьев (Н. Шăхаль), виççĕмĕшĕнче Д. Белов (Вăрмар).
1995-1996, 1993-1994 çулсенче çуралнисем 40 çухрăмлă хушăра тупăшрĕç. Арçын ачасенчен чемпион ятне Д. Яковлев (Вăрмар) çĕнсе илчĕ. Иккĕмĕш вырăнта А. Мекшеев (Ярды ячĕллĕ велошкул), виççĕмĕшĕнче – А. Краснов (Çĕмĕрле хули).
Хĕр ачасем те 40 çухрăмлă хушăрах тупăшрĕç. Çĕнтерÿçи вара малтан кĕтнĕ пекех Вăрманхĕрри Шăхаль хĕрĕ О. Терентьева. А. Михайлова (Н. Шăхаль) Оля хыççăн иккĕмĕш пулчĕ. Аслă çулхи хĕр ачасенчен çĕнтерÿçĕ ятне А. Тарасова (Çĕмĕрле хули) çĕнсе илчĕ. Иккĕмĕш вырăнта Е. Данилова, виççĕмĕшĕнче – И. Портнова (иккĕшĕ те Ярды ячĕллĕ велошкул).
Юлашки ушкăнта аслă çулхи арçын ачасем, арçынсем тата хĕрарăмсем 60 çухрăмлă дистанцире вăй виçрĕç. Вĕсен Н. Шăхалĕнчен Хурама Твара çити икĕ хутчен кайса килмелле. Аслă çулхи арçын ачасенчен чи маттурри А. Александров (Çĕнĕ Шупашкар) пулчĕ. Вĕсем Н. Антонов юлташĕпе пĕрремĕшпе иккĕмĕш вырăнсене йышăнчĕç. Виççĕмĕшĕнче Е. Григорьев (Вăрманхĕрри Шăхаль). Юниорсенчен чемпион ятне В. Галеев (Казахстан) çĕнсе илчĕ. Иккĕмĕш вырăнта Д. Яковлев (Ярды ячĕллĕ велошкул), виççĕмĕшĕнче – Н. Зайцев (Казахстан).
Арçынсен ушкăнĕнче çĕн-терÿçĕ ятне аслă çулхи арçын ачана А. Александрова пачĕç, мĕншĕн тесен вăл çак 60 çухрăмлă хушша пуринчен те малтан вĕçлерĕ, çапла вара вăл икĕ хут çĕнтерÿçĕ ятне тивĕçрĕ. Иккĕмĕш вырăна В. Романов йышăнчĕ (Ярды ячĕллĕ велошкул), виççĕмĕшĕнче – Е. Гаврилов (Çĕнĕ Шупашкар).
Хĕрарăмсен ушкăнĕнче В. Андреевăна çитекенни пулмарĕ. Унăн юлташ хĕрĕсем, Н. Катушкинăпа Э. Петрова, иккĕмĕшпе виççĕмĕш вырăнсенче.
Мала тухнă тата призлă вырăнсене йышăннă спортсменсене Н. Ильин-Тукмакова асăнса çирĕплетнĕ парнесемпе чысларĕç. Уйрăмах кунта Кольăн юлташĕ В. Исаев (Уренгойра пурăнать) пулăшрĕ. Икĕ кун велосипедистсемшĕн пăшăрханса, вĕсене хавхалантарса тăчĕ, спорта юратакан В. Шайманов пенсионер, пурне те шăккалатпа сайларĕ, çирĕп сывлăх, ăнăçу сунчĕ.
Юлашкинчен пурте Кольăн вил тăпри çине пур юлташĕсен тата велосипедистсен ячĕпе чечек кăшăлĕ хучĕç.
В. БОРОДКИН, ăмăрту судйи.