08 августа 2009 г.
Аслă Чемен ялĕнче 2005 çулта çемье врачĕн офи-сĕ уçăлчĕ, вăл тăватă яла тивĕçтерет: Аслă Чемен, Тури Чакă, Шăхач, Кĕçĕн Чемен. 2008 çулта кунтан 484 çын сипленсе тухнă. Пĕлтĕрхи ĕç пĕтĕмлетĕвĕсемпе Аслă Чемен офисĕ республикăри 500 офис хушшинче пĕр-ремĕш вырăн çĕнсе илчĕ. Çакă, паллах, тăрăшмасăр, ĕçлемесĕр пулмасть.
Офисра пиллĕкĕн ĕçлеççĕ: А. Кольцов врач, С. Фролова фельдшер, С. Кудряшовăпа Е. Дубинина медсестрасем, Е. Капитонова санитарка. Ку коллективпа мухтанмалăх та, савăнмалăх та пур. Офиса пырса кĕрсенех куç илемлĕхе туять. Пур çĕрте те таса, тирпейлĕ, çынсене лайăх кĕтсе илеççĕ, сăпайлă калаçаççĕ. Анатолий Валентинович врачра ĕçлеме пуçлани 9 çул, вăл йышăнăва пынă çынсене тĕплĕн тĕрĕслесе сипленме сĕнÿсем парать. Ăна чирлисем кăмăллаççĕ, вăл çынсене чĕртме чун-чĕререн тăрăшать. Халĕ офисра чĕрене тĕрĕслекен аппарат та пур, ватă çынсене тата инвалидсене килĕсенче пăхса тăрать. Çавăн пекех виçĕ çын выртмалли вырăн пур. Кунта медсестрасем укол тăваççĕ, система яраççĕ. Эпир хамăр та мăшăрăмпа Юлия Александровнăпа иксĕмĕр сипленсе тухрăмăр. С. Кудряшова, Е. Дубинина, С. Фролова медиксем ĕçĕсене тирпейлĕ туса пыраççĕ. Канмалли кунсенче те пулăшу памашкăн ÿркенмеççĕ. Малашнехи ĕçре ăнăçу пултăрах вĕсен.
Ÿкерчĕксенче: Аслă Чемен офисĕ; офисра ĕçлекенсен коллективĕ (сулахайран сылтăмалла): Е. Капитонова санитарка, Е. Дубинина медсестра, А. Кольцов врач, С. Капитонов, С. Кудряшова медсестра, С. Фролова фельдшер.
В. БАШМАКОВ, ял старости.