19 августа 2009 г.
Каникула хаваслă та усăллă ирттерес тесе Аслă Чементи Хăрах Кас тата Туптов урамĕнче пурăнакан ачасенчен Н. Кошелева вĕрентекен, депутат ертсе пынипе «Надежда» отряд йĕркеленĕ. Ушкăн 4-мĕш çул ĕçлет. Ачасем ыррине сахал мар туса ирттереççĕ. Урама тирпей-илем кÿреççĕ, çырма-çатрана çÿп-çапран тасатаççĕ, ватăсене тата пĕчĕккисене пулăшаççĕ. Ку хутĕнче, акă, пушартан сыхланасси тата шывра путас хăрушлăх çинчен каласа пачĕ Надежда Васильевна. Хаçат-журналти кăсăклă статьясене те ушкăнпах сÿтсе яврĕç. Концерт лартасси те йăлана кĕнĕ «Надеждăн». Хальхинче те халăх йышлăн пуçтарăнчĕ. Концерта çак урамсенче пурăнакан шкул çулне çитмен ачасем те хутшăнчĕç.
Р. Платонова, К. Селиверстрова, Сашăпа Оля Туптовсем, Дианăпа Саша Матросовсем, А. Лисов, О. Зотова, А. Михайлова, В. Медведев сăввисене пысăк туйăмпа каласа пачĕç. М. Горшковăпа А. Башмакова илемлĕ юрласа тĕлĕнтерчĕç. «Ассорти» ташă ушкăнне çÿрекен Р. Платоновăна, М. Егоровăна тата Е. Зотовăна та хыттăн алă çупрĕç куракансем.
Юрă-ташă хушшинче шÿтсемпе савăнтарчĕç «артистсем». А. Туптов, М. Егорова, М. Смирнов, А. Смолов, Е. Зотова тата ыттисем тăраниччен култарчĕç. А. Башмакова юрланипе çеç мар, тĕрлĕ хускану, гимнастика упражненийĕ тума пĕлнипе те палăрчĕ. А. Кошелев вара музыкăна йĕркелесе пулăшрĕ.
Л. ИВАНОВА. Аслă Чемен.