26 августа 2009 г.
Ĕнер чăваш сăвăçĕ, журналисчĕ, пирĕн ентеш, Альбина Васильевна (Яковлева) Любимова – Юрату 50 çул тултарчĕ.
А. Юрату Нăрваш Шăхалĕнче 1959 çулхи августăн 25-мĕшĕнче кун çути курнă. Ялта çуралса ÿснĕскер, мĕн пĕчĕкрен тăван тавралăх илемне курса-туйса çитĕннĕ. Çепĕç чăваш чĕлхи урлă çут тĕнчене юратма вĕреннĕ, тус-тантăша, тăван-хурăнташа, ял-йыша хисеплеме хăнăхнă. Унăн малтанхи кĕске калавĕсемпе прозăлла сăввисем «Авангард» хаçатра пичетленнĕ.
1976 çулта вăл И.Н. Ульянов ячĕллĕ Чăваш патшалăх университетĕнчи историпе филологи факультетĕнчи чăваш чĕлхипе литератури уйрăмне вĕренме кĕнĕ. Вырăсла таса та илемлĕ калаçма, тĕрĕс çырма пултаракан хĕре 1979 çулта Мускаври М.В. Ломоносов ячĕллĕ университетри журналистика факультетне вĕренме куçараççĕ.
1982 çулта, алла диплом илсен, Альбина Яковлева тăван республикăна таврăнать. Мускавра вĕреннĕ çулсенче вăл пĕр чăнлăха чĕрипе туйса илет: чăн-чăн çыравçă пулма тăван çĕрпе чăваш халăхĕ çеç пулăшĕç. Альбина пĕр вăхăт Елчĕк район хаçатĕнче, Шупашкарти чăлхапа трикотаж фабрикинче радиоредакторта ĕçлет. Çавăн пекех чылай çул хушши Чăваш Республикинчи çут çанталăк ресурсĕсен управленийĕнче пресс-секретарь пулса вăй хурать. Çут çанталăка сыхлас, хÿтĕлес, тăван тавралăх пуянлăхне, илемне килес ăрусем валли упраса хăварас тĕлĕшпе республика хаçат-журналĕнче тĕрлĕ материал пичетлет.
Сăвăç 11 кĕнеке пичетлесе кăларнă.
А. Любимова-Юрату 1992 çултанпа Раççей Писательсен союзĕн членĕ, Эмине ячĕллĕ преми лауреачĕ, Мускавра экологи темипе иртнĕ Пĕтĕм Тĕнчери кинофестивальсен дипломанчĕ (икĕ хут), Чăваш Республикин культурăн тава тивĕçлĕ ĕçченĕ, Чăваш Республикин тава тивĕçлĕ вăрманçи М.А. Овчинниковпа СССР халăх вĕрентĕвĕн отличникĕ В.Н. Мерзлайкин ячĕллĕ, Петр Маркин (Лесной) çыравçă тата Чăваш Республикин культура министерствин премийĕсен лауреачĕ.
Альбина Юрату сăвăçа республикăра çеç мар, Раççейре те, тĕнче шайĕнче те пĕлеççĕ. 1999 çултанпа вăл Пĕтĕм тĕнчери тĕрĕк хĕрарăмĕсен пĕрремĕш курултайне хутшăнать.
Поэтесса сăввисемпе çырнă юрăсем халăхра анлăн сарăлчĕç.
Ентешĕмĕр тăван тăрăха килсен редакцине кĕрсе чуна уçса калаçмалăх вăхăт тупатех.
Эпир те «Авангард» хаçата кун çути кăтартакансем А. Юрату сăвăçа 50 çулхи юбилейпа саламласа çирĕп сывлăх, телей, творчество каçалăкĕнче çитĕнÿсем сунса вулакансене сăвăçăн хайлавĕсемпе паллаштаратпăр. (Хамăр корр.).