05 сентября 2009 г.
– Хирте кашни ĕçĕн хăйĕн илемĕ. Чун та хăйне майлă киленĕç тупать, – тет «Батыревский» хупă акционерла пĕрлешÿре агрономра тăрăшакан Г. Ляллина. Чăнах та, шултăра çĕр улмисене курсан такам та хĕпĕртĕ.
Хуçалăхра «иккĕмĕш çăкăр» 250 гектар йышăнать. «Невский», «ароза», «рамоно» сортсене кунта лартса çитĕнтереççĕ. Кăçал Комсомольски районĕнчи «Слава картофелю» хуçалăхран «ред-скарлит» ятлине туяннă. Тухăç, çанталăк типĕ тăнине пăхмасăрах, лайăх, гектартан 270-280 центнер тухать. Çуркунне минераллă удобренисемпе апатлантарни, лартнă чухнех колорадо нăрри, тымар хурчĕ тапăнасран сиенсĕрлетни, çум курăкран гербицидпа вăхăтра усă курни пысăк витĕм кÿни каламасăрах паллă.
Çĕр улми кăларассине механизацилеме тăрăшнă. «Колнаг» тата «Гримме» комбайнсем пĕр тикĕс ĕçлеççĕ, хăйсемех кăлараççĕ, пуçтараççĕ, пушатаççĕ. Руль умĕнче Ю. Осиповпа В. Раков механизаторсем. Иккĕшĕн те опыт пысăк. Çавăн пекех çĕр улмие пуçтарса кĕртме çынсене те явăçтарнă. Пĕр вăхăт 10 бригадăна, 230 çынна, çитнĕ. Студентсем вĕренме кайнă, шкул ачисем парта хушшине ларнă хыççăн йыш кăшт сахалланнă. Çĕр улми пухнă çĕрте ятарласа отпуск илнисем те, тивĕçлĕ канăва тухнисем те, ют ялсенчен килекенсем те пур. Акă, В. Минина пенсие 8 çул каялла кайнă, апла пулин те ĕçрен пăрăнмасть. В. Макарова отпускрипе усă курса «иккĕмĕш çăкăра» суйлама тухнă. Пурне те кашни кунах укçа параççĕ, икĕ хутчен вĕри апат çитереççĕ.
Продукцие хапăлласах илеççĕ. Тулли сеткăсене хиртенех туянса каякансем те пур. Пĕр машина хыççăн тепри килсех тăрать. Хуçалăх транспорчĕ те ахаль лармасть. В. Ялуков, А. Ресметов, Г. Жидков, Н. Журавлев, П. Козлов шоферсем, П. Кудрявцев тракторист хранилище патне турттараççĕ. Кунта вара чăн-чăн цех. Машинăран тăкăнакан улмасем вăрлăхлăха тата вĕттине уйрăлаççĕ. Ятарлă пĕр бригада çĕрĕк каясран пăхса суйласа тăрать.
Куллен çĕр улми йăранĕсен шучĕсем чакаççĕ. Ĕнерхи кун тĕлне 80 гектарта ĕçе вĕçленĕ. Çанталăк лайăх тăрсан «Батыревский» пĕрлешÿре «иккĕмĕш çăкăра» пуçтарса кĕртесси вăраха тăсăлмасси куçкĕрет.
О. ПАВЛОВА.