09 сентября 2009 г.
Сентябрĕн 5-мĕшĕнче Австралире кросс-кантрире маунтинбайк енĕпе мала тухмалли Тĕнче чемпионачĕ иртнĕ. Унта тĕнчери чи пултаруллă спортсменсемпе пĕрле Раççей тава тивĕçлĕ спорт мастерĕ Нăрваш Шăхальте çуралса ÿснĕ, Патăрьел спортшкулĕн велосипед спорчĕн уйрăмĕнче вĕреннĕ Ирина Николаевна Калентьева та хутшăннă.
Маунтинбайк – сăрт-ту велоспорчĕ. Çавăнпа унăн дистанцийĕсем питех те йывăр. Çапах та Ирина Николаевна чемпионат умĕнхи 3 тапхăрта та иккĕмĕш вырăна йышăннăччĕ. Хальхинче Ирина Калентьева йывăр тупăшура Тĕнче чемпионки ятне çĕнсе илнĕ.
Иринăн пысăк çитĕнĕвĕ унăн ашшĕ-амăшне те, вĕрентекенĕсене те, тренерĕсене те савăнтарать. А. АЛЕКСЕЕВ.