12 сентября 2009 г.
Аслă Чементи ветеринари участокĕ 4 ялти выльăх-чĕрлĕхе пăхса тăрать. Кунта виççĕн: С. Михайлова, Г. Зотова тата Т. Семенова (ÿкерчĕкре) вăй хураççĕ. Светлана Дмитриевна ертсе пынипе участок районта малтисен шутĕнче. 2007 çулта – пĕрремĕш, 2008 çулта иккĕмĕш вырăна тухни, паллах, тăрăшмасăр пулман ĕнтĕ. Кашни уйăхрах палăртнă календарь планĕпе ĕçлеççĕ ветеринарсем. Прививкăсене, юн илессине яланах вăхăтра пурнăçласа пы-раççĕ. Кунта ĕнесене искусственнăй майпа та пĕтĕлентереççĕ. Ферма выльăх-чĕрлĕхне пăхса тăрасси те вĕсен тивĕçĕ. Хуть хăш вăхăтра та чирлĕ выльăх патне пыраççĕ, ырă сĕнÿсем параççĕ. Чĕрĕлмесĕр сиплеме пăрахмаççĕ. Виççĕшĕ те маттур та пултаруллă, ырă та сăпайлă. Çынсемпе яланах кăмăллă калаçаççĕ, пĕр-пĕринпе килĕштерсе ĕçлеççĕ. Çавăнпах ял-йыш вĕсене чунтан хисеплет. Июнь уйăхĕнче Шупашкартан килнĕ тĕрĕслев ветеринарсен ĕçĕнче пĕр кăлтăк та тупса палăртманнине, ла-йăх ĕçленине ятарлă журналта çырса хăварнă.
Участок йĕри-тавра, пÿртĕнче тап-таса. Умра чечексем ÿсеççĕ. Арçын ĕçĕсене те тиркесе тăмаççĕ, лаша тытаççĕ, ун валли уттине хăйсемех çулса тирпейлеççĕ.
Светлана Дмитриевна 27 çул вăй хурать участокра. Хĕрлĕ Чутай хĕрĕ Вăрнарти техникумра ветеринари уйрăмĕнче вĕренсе тухсан Шупашкар районĕнче 4 çул ĕçлет. Унтан Аслă Чемен каччипе Анатолий Михайловпа пĕрлешсе çемье чăмăртать, 3 ачи те пурнăç çулĕ çине тăнă ĕнтĕ вĕсен. Мĕнле кăна грамотăсене тивĕçмен-ши ертÿçĕ 27 çул хушшинче; 1990 çулта «Ударник ХII пятилетки» паллăна илнĕ, 2000 çулта вара районта «Професси енĕпе чи лайăххи» ята илнĕ. Ветеринари ĕçĕнче лайăх вăй хунăшăн 2005 çулта – район пуçлăхĕ Н. Глухов, 2006 çулта – ЧР Патшалăх ветеринари службин инспекторĕ В. Тихонов, 2007 çулта вара ЧР ял хуçалăх министрĕ М. Игнатьев Хисеп грамотисем парса чыс тунă. Чи хакли – 2008 çулта республикăри ытти 14 çынпа пĕрле Раççей Федерацийĕн Ял хуçалăх министерствин грамотине илни. Çакăн пек çÿллĕ шайра хисеп туни, паллах, Светлана Дмитриевна чăн-чăн профессионал пулнине, хăйĕн ĕçне чунтан парăнса ĕçленине пĕлтерет.
Районти выльăх-чĕрлĕх чирĕсемпе кĕрешекен станци начальникĕ П. Ефимов Аслă Чемен ветеринари участокĕнче ĕçлекенсем çинчен чи ырă та ăшă сăмахсемпе çеç аса илчĕ: «Районта чи лайăххисен шутĕнче вĕсем, календарь планĕпе килĕшÿллĕн пур ĕçе те тĕплĕ те вăхăтра пурнăçласа пыраççĕ. Эпĕ пĕлнĕ тăрăх, Н. Чернышев начальник пулса ĕçленĕ чухнех Чеменсем республикăра малтисен шутĕнче пулнă» тесе каласа парать Петр Ильич. «Хамăр енчен эпир вĕсене пур енчен те пулăшса пыма тăрăшатпăр, хаçат-журнал çырăнса паратпăр, эмелсемпе тивĕçтеретпĕр. Ветеринарсем виççĕшĕ те хĕрарăмсем пулсан та, районти нумай ветеринар-арçынсенчен ирттереççĕ», – калаçăва малалла тăсать станци начальникĕ.
Светлана Дмитриевна ĕçтешĕсене пулăшса, вĕрентсе пырать. Г. Зотовăн ĕç стажĕ те пĕчĕк мар ĕнтĕ, 20 çул вăй хурать участокра. Т. Семенова пĕр çул çеç ытларах тăрăшать пулин те, пур ĕçе те вăр-вар та тирпейлĕ пурнăçлать. Шăхач ялĕнче пурăнаканскер, унти халăх выльăх-чĕрлĕхне пăхса тăрать. Кăçал вăл ял хуçалăх академине вĕренме кĕрсе пĕлĕвне малалла тăсасшăн. «Упăшка ăнланни, пулăшса пыни, ĕçе юратни, пĕр-пĕринпе килĕштерсе вăй хуни пире пурнăçра, ĕçре хавхалантарать, – теççĕ ветеринарсем кăмăллăн.
Н. КОШЕЛЕВА.
Аслă Чемен.