12 сентября 2009 г.
Патăрьел район территорийĕнче «Асăрханăр, ачасем» ятпа августăн 17-мĕшĕнче мероприяти пуçланнăччĕ, сентябрĕн 13-мĕшĕнче вăл вĕçленет.
Кăçалхи 8 уйăхра çул-йĕр çинче çÿрекен ачасем хутшăннипе 4 инкек пулнă, вĕсенче 2 ача вилнĕ, 2 ача аманнă.
Мероприяти вăхăтĕнче районти патшалăх автоинспекцийĕпе райадминистрацин вĕрентÿ пайĕ çул-йĕр çинчи хăрушсăрлăха тивĕçтерес енĕпе ĕçлекен комиссире ачасем çул çинче инкеке лекесрен асăрхаттарас ыйтăва темиçе хут сÿтсе явнă. Çапах та çул çитменнисем çул çинчи право йĕркине 6 хут пăснă тĕслĕхе тупса палăртнă.
Автотранспорт предприятийĕсенче ĕçлекенсем хушшинче ачасем енĕпе тимлĕрех пулмалли пирки инструктажсем ирттернĕ. Ачасене илсе çÿренĕ чухне хăрушсăрлăх пиçиххийĕсемпе усă курасси пирки çивĕч асăрхаттарнă.
Вĕренÿ учрежденийĕсенче ачасем çул-йĕр правилисене тĕплĕнрех пĕлччĕр тесе калаçусем ирттернĕ. Автовокзалра водительсемпе пассажирсене ачасемпе çул çинче тимлĕ пулмалли пирки вăйлă сасăпа пĕлтерекен хатĕр урлă асăрхаттарассине йĕркене кĕртнĕ.
ГИБДД ĕçченĕсем ачасене çул çинче йĕркеллĕ тытма хăнăхтарассипе малашне те куллен ĕçлĕç.
А. КУПТАШКИН, ГИБДД уйрăмĕн начальникĕ.