16 сентября 2009 г.
Республикăри ăратпа ĕçлекен «Чувашское» уçă акционер пĕрлешĕвĕнче сентябрĕн 11-мĕшĕнче республика шайĕнче 5-мĕш хут ăратлă выльăхсен куравĕ иртнĕ. Унăн тĕп тĕллевĕ – ăратлă выльăхсене кăтартасси, малта пыракан хуçалăхсен опычĕпе паллашасси, ăратпа ĕçлессине лайăхлатасси тата ытти те. Чăваш Енри пур районти ăратпа ĕçлекен ял хуçалăх предприятийĕсем, фермер хуçалăхĕсем тата уйрăм çынсем выльăх-чĕрлĕх, чăх-чĕп, вĕлле хурчĕсене илсе пынă.
Пирĕн районтан курава «Красное знамя», Ленин ячĕллĕ, «Звезда» хуçалăхсем хутшăннă.
«Красное знамя» кооператив 16-18 уйăхри пушмак пăрусемшĕн – I степеньлĕ диплома тата ылтăн медале, пысăк шурă ăратлă сыснасемшĕн – II степеньлĕ аттестата, вĕлле хурчĕн среднерусски ăрачĕшĕн – II степеньлĕ аттестата, стенд тунăшăн II степеньлĕ аттестата тивĕçнĕ.
Ленин ячĕллĕ çĕр ĕç фирминчи «Надежда» ятлă сăвăнакан ĕне – I степеньлĕ диплом тата ылтăн медаль, абсолютлă чемпионка пулнипе Гран-при илнĕ. Çавăн пекех йывăр туртакан «Светлая» лашашăн – I степеньлĕ дипломпа ылтăн медаль, «Максим» тихашăн II степеньлĕ дипломпа кĕмĕл медаль, «Мук» ятлă буйволшăн I степеньлĕ аттестат парса наградăланă.
«Звезда» хуçалăх пысăк шурă ăратлă сысна амишĕн II тата III степеньлĕ аттестата илме тивĕçнĕ.
Виçĕ хуçалăха та выльăх-чĕрлĕх аталанăвĕнчи лайăх кăтартусемшĕн, пысăк класлă выльăхсене, чăх-чĕппе кăтартнăшăн тата курава активлă хутшăннăшăн диплом тата укçан преми парса хавхалантарнă.
Выльăхсене никама та пăхăнман эксперт, Хусанти Н.Э. Бауман ячĕллĕ патшалăх ветеринари академин медицина уйрăмĕн генетикăпа селекци кафедрин заведующийĕ Р. Хаертдинов хакланă.
О. Павлова.