26 сентября 2009 г.
Республикăри Министрсен Кабинечĕн хушăвĕпе килĕшÿллĕн сентябрĕн 22-мĕшĕнчен пуçласа октябрĕн 1-мĕшĕччен республикăра ыркăмăллăх вунă кунлăхĕ пырать. Çавна май район пуçлăхĕ те Тĕнчери ваттисен кунне хатĕрленесси тата кĕтсе илесси пирки хушу кăларнă. Вĕсемпе килĕшÿллĕн районта ватă çынсен прависене хÿтĕлес, социаллă-культурăллă ыйтăвĕсене тивĕçтерес, ĕçпе вăрçă ветеранĕсене чыслас, çакăнта çамрăксене явăçтарас енĕпе акцисем ирттерме палăртнă.
Социаллă хÿтлĕх пайĕпе пенси фончĕн управленийĕ ĕçлемен пенсионерсене адреслă социаллă пулăшу парассипе те ĕçлеççĕ. Вунă кунлăх вăхăтĕнче район администрацийĕн представителĕсем, предприятисемпе организацисен ертÿçисем, вĕренекен çамрăксем ватă çынсемпе тĕл пулусем ирттерессине йĕркелеççĕ. Уяв концерчĕсемпе çавра сĕтел хушшинчи калаçусем кашни ял тăрăхĕнчех пулмалла.
Ватăсене культура учрежденийĕсенче чысланисĕр пуçне вĕсен пурнăç условийĕсемпе интересленеççĕ. Хĕл каçма мĕнле хатĕрленнине тишкереççĕ. Фельдшерпа акушер пункчĕсен специалисчĕсем инвалидсемпе йывăр чирлисем патне килĕсене çÿресси пырать. Администраци представителĕсем, организаци-предприяти ертÿçисем пысăк юбилярсене саламласси йăлара.
Районти тĕп библиотекăра «Ырă туни çынна савăнăç кÿрет» çавра сĕтел хушшинче калаçу, «Кĕрхи çулçăсен ылтăн пуххи» тĕл пулу, социаллă центрта «Кĕр пуянлăхĕ» выставка, «Çын чунпа çамрăк пулсан çулсем хушăнни нимех те мар» кану каçĕ, шашка-шахмат турнирĕ ирттерме палăртнă.
Çынна ырă туни çĕре ÿкмест. Çакна ăнланаççĕ пурте. Çавăнпа та ыркăмăллăх вунă кунлăхне таса кăмăлпа хутшăнакансем йышлă пуласси куç кĕретех.
(Хамăр корр.).