26 сентября 2009 г.
Вырсарникун, авăнăн 20-мĕшĕнче, район центрĕнче улттăмĕш хут Пĕтĕм Раççейри «Нацисен кросĕ-2009» чупу кунĕ иртрĕ. Спортсменсен парадне район пуçлăхĕ Н. Глухов уçрĕ, пурне те мероприятие пысăк хавхаланупа ирттерме ăнăçу сунчĕ. Патăрьел ял тăрăх пуçлăхĕ А. Ялуков Пĕтĕм Раççейри чупу кунне хутшăнакансене хаваслă стартпа кăтартуллă финиш суннă хыççăн спорт уявне ятарласа килнĕ ентеш Чăваш патшалăх университечĕн ректорĕ Л. Кураков сăмах илчĕ.
– Пысăк пĕлтерĕшлĕ паянхи уявра Патăрьелсен ырă ĕçĕ, харсăрлăхĕ, пултарулăхĕ пирки каламалли пайтах. Паян, акă, администраци умĕнче капăрлатнă вырăнти фонтана пурте ытарайми пăхатпăр. Республикăра кун пек вырăнсем сахал, паллах. Спортри çитĕнÿ – ĕç тухăçлăхĕн çăл куçĕ. Вăл çынна тата хавхаланса ĕçлеме май парать. Ăнăçу сунатăп сире пурне те, – терĕ Лев Пантелеймонович хăйĕн сăмахĕнче. Ун хыççăн мăсăльман тĕнне ĕненекенсене спорт уявĕпе тÿр килнĕ ураза-байрампа ăшшăн саламларĕ.
Шăп та лăп 12 сехетре Пĕтĕм Раççейĕпе спортсменсем чупăва старт илчĕç. Çак вăхăтра район пуçлăхĕ Н. Глухов 1000 метрлă VIP - чупăва хатĕрленсе тăнă организаци-предприяти, учреждени ертÿçисене, райадминистрацин пай пуçлăхĕсене старт пачĕ. Тĕрлĕ çулхи тата тĕрлĕ шайри ертÿçĕсен чупăвне сăнама кăсăклă пулчĕ. Çивĕч кĕрешÿре финиша чăн малтан райадминистрацин социаллă аталану, информаци тивĕçтерĕвĕ тата архив ĕçĕсен пай ертÿçи С. Викторов чупса кĕчĕ.
Ун хыççăн старта пулас спортсменсем, шкул çулне çитмен ачасем тăчĕç. Кĕпĕрленсе чупакан шăпăрлансен тăрăшăвĕ те пурне те тыткăнларĕ. Вĕсенчен чи-чи кĕçĕн спортсмен – Сăкăтри «Родник» ача садĕнчи Д. Кариков. Дима пилĕк çулта çеç пулин те çĕр метрлă дистанцие ăнăçлă чупса тухрĕ. Чупăва хутшăннисенчен чи асли те çак ялтанах. Н. Ларионов ĕç ветеранĕ вăтăр çул ытла ĕнтĕ спортпа туслă. Хальхинче те хăйĕн 70 çулне пăхмасăрах ыттисемпе юнашар старта тăчĕ.
Чи-чи вăйлă чупакансем хушшинче яланхиллех Первомайскисем палăрчĕç. Вуннăмĕш класра вĕренекен Руслан Мулгачев чылай юлташĕсене хыçа хăварса хĕрлĕ хăйăва пĕрремĕш татрĕ.
Пĕтĕм Раççейри «Нацисен кросĕ-2009» чупу кунне районĕпе пин çурра яхăн спортсмен хутшăнчĕ.
А. Егорова.