03 октября 2009 г.
Класра шăп. Шăна вĕçни илтĕнет теççĕ çакăн пек чухне. Çĕнĕ темăна ăнлантарса пĕтернĕ хыççăн Кивĕ Ахпÿртри пĕтĕмĕшле пĕлÿ паракан тĕп шкулти математика учительници Р. Белкова доска çине уравнени çырчĕ. Ăна ачасене шутлама сĕнчĕ. Кăштах сывлăш çавăрмалăх та пур темелле. Анчах хыçалти партăри ача шухăша кайрĕ. Ăнлансах çитереймен иккен. Ун патне пычĕ Раиса Всеволодовна. Доска умне тухма сĕнчĕ. Темăна çĕнĕрен шĕкĕлчесе уравнение шутларĕç. Йывăрлăхĕ çуках та иккен. Унтан килти ĕçе тĕрĕслерĕ педагог. Урока тĕрлĕ мелпе ирттерет вăл. Çакăн пек чухне ачасем ывăнмаççĕ. Ĕçлес пултарулăхĕ ÿсет. 25 çул класра урок парса вĕрентÿ процесне алăри пилĕк пÿрне евĕр шĕкĕлчеме пултарать. Муркаш районĕнчи пĕр ялтан качча килнĕскершĕн кÿршĕ те, тăван та, ял-йыш та çывăх ăна. Кашни вĕренекенĕн ашшĕ-амăшне пĕлет. Вăл килнĕренпе çуралнăскерсем те çемьеллĕ пулаççĕ те. Шкул картлашкипе утса тухнăскерсене пурне те çывăх туять
– Ачасемпе ĕçлеме интереслĕ. Н. Салмина, Н. Ярусова, Н. Антипова, А. Мышина, В. Андреева тата ыттисем те район, республика, Раççей шайĕнчи олимпиадăсемпе конкурссене хутшăнаççĕ. Наукăпа практика конференцийĕсене ĕçсем тăратаççĕ. Дипломпа таврăнни савăнтарать. Вĕсен çĕнтерĕвĕшĕн хĕпĕртетпĕр. Ĕçĕ те хушăнсах пырать. Хамăр тавракурăмлăха анлăлатмасăр, кăткăсран та кăткăс математика задачисене шутламасăр тăваймастăнах-çке çитĕнĕве, – каласа парать Р. Белкова.
Сăмах май çакна та палăртса хăвармалла. Çĕнĕлĕх кĕртме тăрăшакан педагогсен фестивальне хутшăнать хăй те.
Тăххăрмĕш классен ертÿçи Раиса Всеволодовна. Вĕсен кăçал патшалăх экзаменĕ тытмалла. Халех хатĕрленме пуçăнмалла. Çакна урокра та, ун хыççăн та илсе пыма тăрăшать педагог.
Вĕренÿри хастарлăхпа çеç палăрмасть класс. Д. Мышин, А. Сеприханов, А. Марков Раççей шайĕнчи спорт ăмăртăвĕсенче çитĕнÿсем тăваççĕ. Класс тулашĕнчи мероприятисем ирттерсех тăраççĕ. Вăрçă, ĕç ветеранĕсене тĕл пулăва чĕнеççĕ. Похода кайни те туслăха çирĕплетет. Пурнăç çулĕ çине тăма хатĕрленекенсене çак та кирлĕ-çке.
Педагог ĕçне тивĕçлипе туса пынине шкул, район администрацийĕ, вĕрентÿ министерстви панă грамотăсем те çирĕплетеççĕ. Портфолио те хулăнлансах пырать.
Ăспа диплом илнĕ темелле Раиса Всеволодовнăна. Вăл вĕреннĕ вăхăтра ашшĕ-амăшĕ аслă шкул тĕлне те пĕлмен. Çитменнине ашшĕ хĕрĕ виççĕре чухнех пурнăçран уйрăлнă. Амăшне виçĕ ачана аттестат илнĕ хыççăн та малалла вĕрентме çăмăлах пулман. Хурапа шурра туйнă çитĕнекен ăру. Çавăнпа шкулта илнĕ пĕлÿпе лăпланса ларман, малалла вĕреннĕ.
Мăшăрĕ те педагог Р. Белковăн. Валерий Дмитриевичпа иккĕшĕ пĕр факультетрах вĕреннĕ.
Улми йывăççинчен аякка ÿкмест теççĕ. Икĕ ывăл çитĕнтереççĕ вĕсем. Дима Мускаври çул-йĕр институчĕн Шупашкарти филиалĕнчен вĕренсе тухнă хыççăн çар ретĕнче те пулчĕ. Женя университетăн строительство факультетĕнче пĕлÿ пухать. Тепĕр çул диплом илет.
25 çул хунямапа пурăнать Раиса Всеволодовна. Уншăн хĕрĕ вырăнĕнчех. Елена Спиридоновна вырăн çинчен анайманни те нумай вăхăт.
Ялти çын тĕп ĕçпе çеç лăпланмасть. Çĕрĕ те, выльăх-чĕрлĕхĕ те пур. Çĕр çинче ĕçлеме техника та çителĕклех. Унсăр пуçне агроном та, зоотехник та пулмалла-çке.
– Пурнăç пурне те вĕрентет, – тет Раиса Всеволодовна. – Анне те ĕçрен ÿркенме хушман, хунямапа хуняçа та çакна мала хума пехил панăччĕ.
Ялта пурăнаканăн ура тупанне çĕре тивертмесĕр утмалла çав. Çакă Р. Белковăна пырса тиветех.
А. Астраханцева.