03 октября 2009 г.
23 çул ĕçлет Пăлапуç Пашьелĕнчи вăтам шкулта Н. Тихонова. Ĕçе И. Яковлев ячĕллĕ Чăваш патшалăх педагогика институтĕнчен вĕренсе тухсан пуçăннă. Пĕрремĕш категориллĕ педагога çитнĕ Нина Валентиновна. Ĕçе юратни ÿсĕмсем тума пулăшнă та ăна.
Музыка ертÿçи Н. Тихонова. Ачасене шăпах музыкăна юратма хăнăхтарать те вăл. Маларах çакна хăй туйса илнĕ.
Музыка урокĕсем – ăсталăх урокĕсем. Кашнийĕшĕ шкул ачин пурнăçне аталантарма пулăштăр тесе тăрăшать педагог. Д. Кабалевский программипе ĕçлени творчествăра нумай енсене пурнăçа кĕртме май пачĕ. Нина Валентиновна ачасене музыка çинчен интереслĕ, шухăша каймалла каласа парать. Юрăсене професси шайĕнче вĕрентет. Теори пĕлĕвĕсене вĕренекен патне çитерме пĕлет. Класс тулашĕнчи ĕçсене те кăмăлтан явăçтарать. Музыка занятийĕсенче итлес туртăма хăнăхтарать. Вĕренекенсене уйрăмшарăн, ушкăнпа юрлама вĕрентет. Урока калаçу мелĕпе ирттерни те темăна ăнланма пулăшать, асра тытса юлма май парать.
Ачасем музыкăна юратаççĕ. Уроксенче проигрывательпе магнитофон та алă айĕнчех педагогăн. «Караоке» музыка центрĕ пулни вара тата çăмăллăх кÿрет. Ачасем юратсах усă кураççĕ унпа. Вĕсен юрлас ăсталăхне ÿстерме пулăшать-çке-ха вăл. Юрра фонограммăпа юрланă чухне вĕренекенсем хăйсене артист евĕрех тытаççĕ.
Уроксенче музыка инструменчĕсемпе выляссипе вара мухтанмалăх çук. Сăлтавĕ – йÿнерех, пахарах, ачасене илĕртекен музыка инструменчĕсем çуккинче. Кабинетра пурри те хут купăс, 2 баян, аккордеон, йывăç кашăксем, параппан, бубен çеç.
Ачасене урокра чуна çывăх музыка тыткăна илни кирек мĕнле произведение çăмăллăнах алла илме май парать. Вĕсем хăйсем тĕллĕн темăна хак пама явăçаççĕ. Нина Валентиновна шăпах çакнашкал лару-тăрура ачасен шухăшне аталантарса вĕçне çитиччен каласа пама ирĕклĕ туса хурать. Хăш-пĕр вĕренекен калаçăва явăçасшăнах мар. Вĕсене те хутшăнтарать Н. Тихонова. Пĕр-пĕр шухăшне малалла аталантарса ямашкăн пулăшса ярать. Е киле ĕç парать. Ăна çырса килме сĕнет.
Кашни ача пĕчĕк çăлтăр евĕр. Йăлтăртатса хăюсăр çулăмпа çунать вăл. Çăлтăр малалла мĕнлерех ялкăшасси учительтен ытларах килет.
Нина Валентиновна ертсе пынипе шкулта икĕ кружок ĕçлет: «Çеçпĕл çеçкисем» тата ташăçăсен. Вĕсен репертуарĕнче паянхи чăваш халăх юррисем, йăли-йĕрки, ташăсем. Ачасем музыка тата тематика каçĕсене хастар хутшăнаççĕ.
Педагог профессине малалла тăсакансем пурри савăнтарать.
Нина Валентиновна урокра компьютерпа та ĕçлет. Проектпа вĕрентÿ технологийĕсене çĕнетсе пырса вĕсемпе урок парать, класс тулашĕнчи мероприятисенче усă курать. Вĕренекенсене мультимедиапрезентацийĕсене кăтартать. Электронлă вĕрентÿ пособийĕсене уçкаласах тăрать.
Халиччен мĕн тунипе лăпланса лармасть, професси ăсталăхне ÿстерсех тăрать.
Л. БАЗУНОВА,
вĕрентÿ пайĕн методисчĕ.