03 октября 2009 г.
Çын хăй юратнă ĕçĕнче кăна киленĕç тупать, çитĕнÿсем тăвать. Патăрьелĕнчи пĕрремĕш шкулта истори предметне вĕрентекен Н. Андреева та чунĕ ыйтнă профессиех суйласа илнĕ. Педагог пулса пурнăç çулĕпе утма ăна Турă хăй те пилленĕ. Пĕр сăмахпа каласан учитель пулмах çуралнă вăл.
1998 çулта Патăрьелĕнчи пĕрремĕш шкула вĕренсе пĕтернине çирĕплетекен аттестат илнĕ хыççăн Наталия Борисовна Шупашкарти Чăваш патшалăх университечĕн истори факультетне кĕрет. Юлашки курсра ăс пухнă чухнех хăй вĕреннĕ шкулта ачасене пĕлÿ пама тытăнать. Н. Андреева кăçалхипе 11-мĕш çул педагогра тăрăшать. Çак тапхăрта çитĕнÿ хыççăн çитĕнÿ тунă, хăйĕн тавра курăмне аталантарнă. Аслă пĕлÿ илнипе кăна çырлахман, аспирантура пĕтернĕ. Паян вăл истори наукисен кандидачĕ (ку ята 29 çулта чухне тивĕçнĕ), çавăн пекех Чăваш патшалăх университечĕн Патăрьелĕнчи гуманитари институчĕн гуманитарипе право дисциплини кафедрин доценчĕ, пысăк категориллĕ учитель, ултă статьяпа монографи авторĕ.
Çамрăк та тăрăшуллă учителĕн пултарулăхне вĕрентÿ управленийĕ, район администрацийĕ, Пĕтĕм Раççейри учительсен клубĕ, ЧР Çамрăксен политики тата вĕрентÿ министерстви Хисеп грамотисемпе хакланă. 2005 çулта ЧР Президенчĕ Н.Федоров хастар яш-кĕрĕме паракан стипендине илме тивĕçнĕ. Кăçал Н. Андреева районта иртекен Акатуй-Сабантуйра «Професси тĕлĕшĕнчен чи лайăххи» ята çĕнсе илнĕ.
Педагог хăйĕн ĕçне ячĕшĕн кăна мар, ачасене чăн-чăн пĕлÿ парассишĕн тăрăшса туса пыни вĕренекенĕсенче питĕ лайăх курăнать. Унăн вĕренекенĕсен историпе вăтам балл 4,3 шутланать. Пĕрлĕхлĕ патшалăх экзаменне тытакансен те кăтартăвĕсем республикăри вăтам кăтартуран лайăхрах. Çавăн пекех район, республика, Раççей шайĕнче иртекен ăмăртусенче те малти вырăнсене йышăнаççĕ. Акă, кăçал 11-мĕш класра вĕренекен Вероника Барышникова Раççей шайĕнче истори предмечĕпе иртнĕ «Пултаруллă ачасем» чемпионатра пĕрремĕш вырăн çĕнсе илнĕ.
Ача малашлăхра мĕнле професси суйласа илесси учительтен те нумай килет. Н.Андреева вĕренекенĕсем хушшинче унăн ĕçне малалла тăсакансем те пур. Ыхра Çырминчи, Шăнкăртамри иккĕмĕш шкулта истори предметне вĕрентекен Г.Абубекеровăпа Э. Шарафутдинова шăпах çавсен йышĕнче. Чăваш патшалăх университечĕн истори факультетĕнче те тата тăваттăн ăс пухаççĕ.
Кăçалхи çул Наталия Борисовнăшăн савăнăçлă та, хурлăхлă та пулчĕ. 7 çул каялла класс ертÿçи пулса йышăннă ачасемшĕн юлашки шăнкăрав янăрарĕ. Хăй те çамрăк пулнăран вăл çитĕнекен ăрупа питĕ хăвăрт пĕр чĕлхе тупнă. Шкулта иртекен кашни мероприятие пурте пĕр çын пек пулса хутшăннă, вĕренÿре те лайăх ĕлкĕрсе пынă. Унăн 24 вĕренекенĕнчен 21-шĕ тепĕр хут тĕрлĕ аслă шкул партти хушшине ларнă. Пиллĕкĕн вăтам шкула медальпе пĕтернĕ: икĕ ылтăн (Р. Шакмаков, В. Лекарев) тата виçĕ кĕмĕл (А. Фасхутдинова, А. Югаметова, Ю. Павлов).
Наталия Борисовна пирки халăхра «хăй ĕçĕнче чăн ăста» теççĕ. Н. Андреева ачасене чун-чĕререн тăрăшса вĕрентни куç умĕнче.
О. Павлова.