14 октября 2009 г.
Чыслă хăна килессе кĕтсех– тăр шăматкун Юхмапа Пăла тăрăхĕнче хĕвеллĕ те уяр çанталăк тăчĕ. Çак куна Кĕçĕн Патăрьелсем ыйтса илнĕнех туйăнчĕ. Кашнин питĕнче хавас кулă палăрать. Вĕсем пурте «Олимп» комплекслă спорт площадкине пуçтарăннă. Чăваш Республикин Президентне Н. Федорова район пуçлăхĕ Н. Глухов, Тăрăн ял тăрăхĕн ертÿçи В. Рубцов кĕтсе илчĕç.
Кунта республика ертÿçине чĕнме сăлтавĕ те пур. Николай Васильевич кăçалхи январĕн 19-мĕшĕнче ял хуçалăхне аталантарма тивĕçлĕ майсем туса парас тĕллевпе ял тăрăхĕсенче çурт-йĕре комплекслă майпа компактлă лартас тата вĕсене тирпей-илем кĕртес енĕпе пилотлă проекта пурнăçласси çинчен Указ кăларнăччĕ. Вăхăчĕ нумай та мар. Çак хушăра кунта тĕлĕнмелле чаплă кермен çĕкленнĕ. Ăна хута яма 40 миллион тенкĕ ытла тăкакланă. Объектра «Спецстройкоммуникации» (ертÿçи В. Миронов), «Шыгырданы» (З. Халитов), «Энергосетьстрой» (А. Смирнов) пĕрлешÿ ĕçченĕсем вăй хунă. Шыв та пур. Çутă кĕртнĕ. Автомобиль çулĕпе тротуар сарнă тата ытти те. Пăхсан тĕлĕнмелле. Халапри евĕрех.
Патăрьелсем тăрăшуллă, ĕçчен халăх пулнине палăртрĕ Н. Федоров. Çакна спорт объектне кĕске хушăрах çĕкленипе тепĕр хут çирĕплетрĕ. Çавна май хăйĕн сăмахĕнче тепĕр Указ кăларнине асăнчĕ. 2010 çулта Республика кунне Шупашкарта тата Патăрьелĕнче ирттерессине пĕлтерчĕ.
– Патăрьел районĕ кунран-кун çĕкленсе, çĕнелсе пырать. Çакна муниципаллă районсем хушшинчи конкурсра çĕнтерни те çирĕплетет. Малашлăхра тата та тăрăшарах ĕçлемелле сирĕн. Уява района сумлă хăнасем нумай килĕç. Вĕсемпе ĕçлĕ, туслă çыхăнусем пуçарма пулĕ, – терĕ Чăваш Ен ертÿçи.
Çакнашкал спорт объекчĕсем ĕмĕтре çеç пулнă. Чылай регионсенче вĕсем çинчен пĕлмеççĕ те. Çĕр-шывĕпе те çакнашкал спорт комплексĕ 144 çеç. Вĕсенчен 16-шĕ вара пирĕн республикăра. Спорт комплексĕсем çĕклессипе Раççейĕпе виççĕмĕш вырăнта пынишĕн епле хĕпĕртемĕн. Ачасен пуласлăхĕшĕн мар-и-ха çакă. Кунта ватти-вĕтти килсе сывлăха çирĕплетме пултарать.
Паха кермен уçнишĕн чунтан савăннине аэробика занятине çÿрекенсем те палăртрĕç. Н. Глухов вара ачасене çамрăкранпах спортпа пиçĕхтерсе ÿстерни тĕнче класлă спорт маçтăрĕсем хатĕрлеме пулăшнине тĕслĕхсемпе çирĕплетрĕ. Тĕслĕхе И. Калентьевăна, А. Деверинскаяна асăнчĕ.
Социализмла Ĕç Геройĕ В. Никитин Чăваш Ен Президенчĕ тĕллевлĕ программăсемпе ĕçлеме пултарнине пула яла çакнашкал ырлăх çитнине палăртрĕ.
Сумлă хăнасем асăнмалăх йывăç лартрĕç.
Чăваш Республикин Президенчĕ Н. Федоров тата Чăваш Республикин Ял хуçалăх министрĕ М. Игнатьев Александрпа Оксана Илюткинсен хушма хуçалăхĕпе паллашрĕç. Чăн-чăнах кермен ку! Вĕсене пÿртне тума патшалăх енчен сумлă пулăшу тивĕçнĕ. Президентăн «Ялсен производство сферине ертсе пыракан кадрсемпе тивĕçтерес ĕçри специалистсене патшалăх енчен хушма пулăшу парасси çинчен» Указĕпе килĕшÿллĕн ăна пĕр миллион тенкĕ уйăрса пулăшнă. «АПК аталанăвĕ» приоритетлă наци проекчĕпе çăмăллатнă кредит та илнĕ çемье. Çурта, хуралтăсене хăтлă çавăрнă. Икĕ ача ÿстереççĕ. Çĕрпе усă курса пахча çимĕç çитĕнтереççĕ. Малашлăхра выльăх-чĕрлĕх те усрасшăн.
Çул хĕрри (Придорожная) урамĕнче çамрăксем пурăнаççĕ. Хула условийĕсенчен пĕрре те кая мар кунта. Çурт умне асфальт çитнĕ. Газ, шыв кĕрет. Çул урлă – компактлă спорт площадки.
Илюткинсем Чăваш Ен Президентне, район пуçлăхне кÿнĕ пулăшушăн тав турĕç. Николай Васильевич вара чăваш халăхĕн ĕçченлĕхне тепĕр хут палăртса кашни тенкĕпе перекетлĕ усă курма пултарнине çирĕплетрĕ. Ырă ĕç опытне ыттисем те усă курасса шанчĕ. Республика кунĕнче хăнасене кăтартса савăнтармалли пурах Патăрьелсен терĕ.
А. Астраханцева.