14 октября 2009 г.
Патăрьелĕнчи пĕрремĕш вăтам шкулта республикăри çамрăксен «Суйлав – кирлех» вĕрентÿллĕ проекчĕн зонăри конкурсĕ иртрĕ. Унта Патăрьел, Елчĕк, Шăмăршă, Комсомольски районĕсенчи шкулсенче вĕренекен яшсемпе хĕрсем хутшăнчĕç. Конкурса сумлă жюри хакларĕ. Мероприятие Раççейри Çамрăксен çулталăкне халалланă. Çĕр-шыв пуласлăхĕ çитĕнекен ăрура пулнине шута илсе суйлав пĕлтерĕшне анлăрах çутатас тĕллеве тĕпе хунă.
Çавна май ачасене маларах ĕç панă. Программăпа килĕшÿллĕн конкурса хутшăнса стена хаçачĕ кăлармалла. Ăна вара тăрăшса хатĕрленĕ. Ку енĕпе мала Комсомольскисем, унтан Патăрьелсем, виççĕмĕшне Шăмăршăсем, тăваттăмĕшне Елчĕксем тухрĕç.
«Суйлав кунĕ» конкурс та интереслĕ иртрĕ. Патăрьелсем «Çил-тăман та, çил те сана ан хăраттăр, Раççее кама кирлĕ çавна эс суйла» чĕнÿпе йĕркеленĕ. Ачасен ăсталăхĕ пурах. Кунта Патăрьелсем çĕнтерчĕç.
Командăсен капитанĕсен пултарулăхне те тĕрĕслерĕ жюри. Ятарлă 11 ыйтăва хуравларĕç вĕсем. Пурте суйлавпа çыхăннăскерсем. Хуçасем çухалса каймарĕç, малти вырăна алăран ямарĕç.
«Суйлава – юрăпа» сцена çине çакăн пек тухрĕç тăваттăмĕш ĕçпе конкурсантсем. Патăрьелсем каллех зала хускатса юрларĕç. Вĕсене çамрăксем хавхалантарса пычĕç. Суйлав пĕлтерĕшне ăнланать çитĕнекен ăру. Хăйĕн сассине тĕрĕс парсан малашлăх çул-йĕрĕ тĕллевлĕ пуласса çирĕп шанать.
Сцена çине тухакансен актер ăсталăхĕ те пур. Шÿтлеме те пултараççĕ. Çав вăхăтрах çитĕнсе пыни те палăрать вĕсенче.
Конкурс пĕтĕмлетĕвне республикăри Тĕп суйлав комиссийĕн председателĕн çумĕ А. Цветков турĕ. Çакнашкал мероприяти ытти зонăсенче те иртнĕ. Анчах пĕринче те хуçасем çĕнтереймен. Патăрьелсем вара ниçта та çухалса кайманнине çирĕплетрĕ. Ку хутĕнче те пĕрремĕш вырăна тухнине пĕлтерчĕ. Командăна тав хучĕпе хаклă парне пачĕ. Кашни конкурс тапхăрне сакăршар балпа хакланă. Юлашки номере вара вунă балл лартнă. Лайăхран лайăххине пĕлтермест-и-ха çакă;
Иккĕмĕш вырăна Комсомольскисем, виççĕмĕшне Шăмăршăсем, тăваттăмĕшне Елчĕксем тухрĕç.
Çавăн пекех А. Цветков район пуçлăхĕн пĕрремĕш çумне Р. Селиванова, Патăрьелĕнчи пĕрремĕш вăтам шкул директорне В. Солдатова тав хучĕсем пачĕ. Владислав Всеволодович хăйĕн сăмахĕнче ачасемпе ĕçлекен педагогсене уйрăмшарăн палăртрĕ. Районти территори суйлав комиссийĕн председателĕ М. Сепперов суйлава хутшăнма хатĕрленекен çамрăксен çутă пуласлăх пуррине паянхи мероприяти те çирĕплетнине палăртрĕ.
Конкурссем хушшинчи тăхтавсенче республикăри Тĕп суйлав комиссийĕн представителĕсем залра ларакансене суйлавпа çыхăннă ыйтусем парса хуравĕсене тĕрĕслерĕç. Çĕнтерÿçĕсем парнесене тивĕçрĕç. Патăрьелĕнчи пĕрремĕш вăтам шкулта вĕренекенсем савăк юрăсем шăрантарчĕç, «Евгения» ташă ушкăнне çÿрекенсем хăйсен пултарулăхне кăтартрĕç.
А. ИВАНОва.