17 октября 2009 г.
Шăнкăртамри 2-мĕш вăтам шкулта регионсем хушшинчи VI наукăпа практика конференцийĕ иртрĕ. Унăн теми: «Çамрăксене кăмăл-сипет енĕпе воспитани парас ĕçри Ислам вырăнĕпе пĕлтерĕшĕ». Кăçал ăна Чăваш Республикинчи Мăсăльмансен тĕн управленийĕ 15 çул тултарнине халалларĕç.
Конференцие Патăрьел район пуçлăхĕ Н. Глухов, ЧР Вĕрентÿпе çамрăксен политикин министрĕ Г. Чернова, ЧР Культура министерствин управлени начальникĕ М. Краснов, тутарсен Тĕнчери конгресĕн ĕçтăвком председателĕ Р. Закиров, Шупашкар – Чăваш епархийĕн Кăнтăр округĕн благочиннăйĕ Анатолий атте, тутарсен Чăваш Енри автономийĕн ертÿçи Ф. Гибатдинов, Тутарстан, Мордва, Дагестан республикисен, Ульяновск, Владимир, Чулхула облаçĕсен, Муромпа Санкт-Петербург, Мускав, Хусан хулисен делегацийĕсем хутшăнчĕç. Вĕсен хушшинче паллă ăсчахсем йышлă.
Конференцие Мăсăльмансен Раççейри тĕн управленийĕн председателĕн пĕрремĕш çумĕ, Чăваш Енри тĕн управленийĕн председателĕ Альбир-хазрат Крганов ертсе пычĕ. Форум Коран вуланинчен, халăх юрри юрланинчен пуçланчĕ.
Кун йĕркинчи ыйтупа çыхăнтарса ЧР Вĕрентÿпе çамрăксен политикин министрĕ Г. Чернова, Чулхула облаçĕнчи Мăсăльмансен тĕн управленийĕн председателĕ Гаяз-хазрат Закиров, Кăнтăр округĕн благочиннăйĕ Анатолий атте, Чăваш Енри Тутарсен автономийĕн ертÿçи Ф. Гибатдинов докладсем турĕç. Тĕп темăпа тухса калаçакансем те йышлă пулчĕç.
Юлашкинчен тăхăр номинаципе Фетхи Бурнаш ячĕллĕ премие пачĕç.
А. Алексеев.