17 октября 2009 г.
Тĕнчери ваттисен кунне районта тивĕçлĕ шайра ирттерме тăрăшрĕç. Социаллă хÿтлĕх пайĕн ĕçченĕсем ял тăрăхĕсен администрацийĕсен ĕçченĕсемпе чунпа ватăлманнисен пурнăç условийĕсемпе интересленчĕç, хĕле хатĕрленнине тишкерчĕç. Раççей пенси фончĕн районти уйрăмĕпе килĕшÿллĕн 48 пенсионера 51 пин те 400 тенкĕлĕх адреслă пулăшу панă.
Вăрçă вăхăтĕнчи тыл ĕçченĕсемпе ĕç ветеранĕсене пулăшу кÿмелли саккунпа килĕшÿллĕн вĕсен счечĕсем çине укçа хунă.
Кăçалхи 9 уйăхра 16 çынна инвалидсемпе ветерансен реабилитаци центрĕнче сипленме тÿлевсĕр путевкăпа тивĕçтернĕ. «Çăлкуç» профилакторинче те аслă çулхи çынсемпе реабилитаци мероприятийĕсене ирттернĕ.
Аслисене хисеплесси авалтан пыракан ырă йăла. Районти шкулсенче 76 тимур команди ĕçлет, вĕсене 956 вĕренекен çÿрет. Ыркăмăллăх акци вăхăтĕнче 473 ватă çынна пахча çимĕç пухса кĕртме пулăшнă.
Ваттисен кунĕнче шкулсенче ирттернĕ тĕл пулусем ачасенче патриотизм туйăмне çĕклеççĕ.
Кăçалхи 9 уйăхра 37 çын хăйсен юбилейне паллă турĕç. Вĕсене район администрацийĕн представителĕсем, предприятипе организаци ертÿçисем килĕсене кайсах чысларĕç.
Ял хуçалăх предприятийĕсен, учрежденисен, организацисен ертÿçисем ваттисен кунне ирттерме сумлă пулăшу кÿчĕç. Районти социаллă центрта уяв сĕтелĕ хатĕрлерĕç, кану каçĕ ирттерчĕç, «Манăн çулсем – манăн пуянлăх» ятпа концерт пулчĕ. Çулленех йĕркелекен йăлана кĕнĕ выставкăна кĕр пуянлăхне тăратрĕç. Çимĕçĕсемпе чечекĕсене ваттисен çурчĕсенче çитĕнтернĕ.
Кунтах ветерансемпе шашка-шахмат турнирĕ йĕркеленĕ. Мала тухнисене хаклă парнесемпе грамотăсем, ыттисене тав çырăвĕсем панă.
Районти тĕп библиотекăн вулав залĕнче кĕнеке выставки йĕркеленĕ, пĕчĕк брошюрăсем хатĕрленĕ. «Эпир сирĕн пата пыратпăр» акципе вулав çуртĕнче унччен ĕçленĕ ватăсем патне çитнĕ.
Парикмахерскисенче аслă çулхи çынсен ыйтăвне çурма тÿлевпе тивĕçтернĕ.
Алманчăсем те сумлă аксакалсене тивĕçлипе чысланă. Тĕслĕхлĕ библиотекăра ача сачĕн воспитанникĕсем, шкулта вĕренекенсем концерт лартнă.
Çĕнĕ Ахпÿрт ял тăрăхĕнчи ватăсене чыслама уйрăм çынсемпе предпринимательсем пулăшнă. Ытти ял тăрăхĕсемпе ял хуçалăх предприятийĕсенче те сумлă çынсене уяв ячĕпе чыслассине мала хунă.
(Хамăр корр.).