17 октября 2009 г.
Первомайскинчи культурăпа халăх пултарулăх аталану центрĕпе ялти тĕслĕх библиотеки «Сывă çамрăк – сывă общество» темăпа çавра сĕтел тавра калаçу ирттернĕ. Çамрăк çемьесен тĕл пулăвĕнче пурнăçра алкогольпе наркотик, ытти наркăмăшлă япаласем пысăк сиен кÿни, вĕсенчен асăрханмалли пирки каланă.
Тирпейлĕ пулма та ăнланулăх кирлĕ
Ыхра Çырми ял тăрăхĕпе бюджет сферин ĕçченĕсем пысăк субботник ирттернĕ. Вĕсем Патăрьел районĕн чиккинчен пуçласа Треньел ялĕ патне çитичченех аслă çул айккинчи çÿп-çапа пуçтарнă, йĕркене кĕртнĕ.
Çак аслă çулпа чылайăшĕ автомобильпе иртсе çÿрет. Çавăнпа та водительсен те, пассажирсен те обществăлла вырăна вараласран питĕ тимлĕ, ăнлануллă пулмалла. Тасатнă çĕрте çеç мар, вараламан вырăнта тавралăх хитре курăнтăр.
Профилактика канашĕн
черетлĕ ларăвĕнче
Пикшик ял тăрăхĕнче профилактика канашĕн черетлĕ ларăвĕ пулнă. Унта ЧР Сывлăх сыхлавĕпе социаллă аталану министерствин районти хÿтлĕх пайĕн ĕç сыхлавĕ енĕпе ĕçлекен специалисчĕ Г. Крылов, Еншикри пуçламăш шкул директорĕ М. Селиванова хутшăннă. Ларура çул çитмен ачасемпе тимлекен органсемпе профилактика учрежденийĕсенче шутра тăракан йывăр çемьесене пăхса тухнă.
Профилактика канашĕн ларăвĕнче шута илнĕ йывăр çемьесене ытларах обществăлла ĕçе явăçтарасси пирки каланă. Старостăсемпе ял тăрăх депутачĕсен те çакнашкал çемьесене тимлĕхрен кăлармалла мар.
А. Николаева.