17 октября 2009 г.
Пĕрисене çуралсанах сăпкара сиктереççĕ, кăшт йĕрсенех ĕмкĕч параççĕ. Ÿссе çитĕнсен те ашшĕ-амăшĕ ачин кашни ыйтăвне тивĕçтерме тăрăшать: машина, çурт, хаклă япаласем... Теприсем вара мĕн ачаран çăкăр хакне пĕчĕкрен пĕлсе ÿсеççĕ, кашни пуса хăйсен вăйĕпе ĕçлесе илсе пурнăç çулĕ çине тăраççĕ. Сителте пурăнакан В. Кондратьев шăпах теприсен шутне кĕрет.
Ăна пурнăç йĕрсен те ачашламан, такăнсан та йăпатман. Çавăнпах вăл пĕр хăрамасăр малалла пăхать, ĕмĕр сукмакĕпе çирĕп пырать.
Василий Петрович пиллĕкмĕш класра чухне ашшĕ вилет, амăшĕпе кăна юлаççĕ. Тăххăрмĕш класа çитсен амăшне те ĕмĕрлĕхех çухатаççĕ. Василийран аслăрах икĕ тетĕшĕпе аппăшĕ шкултан вĕренсе тухнă пулсан, кĕçĕн шăллĕ виççĕре кăна пулнă. Хăр тăлăха юлнăскерсене интернат кăна кĕтнĕ, çакна шута хурса тăван тетĕшĕпе инкĕшĕ вĕсене хăйсен хÿттине илнĕ. Вера Анатольевнăпа Вячеслав Петрович шкултан вĕрентсе кăларнă, професси илме пулăшнă, салтака ăсатса ярса кĕтсе илнĕ, мăшăрлантарнă.
– Тетепе инкене тав сăмахĕ каласа пĕтермелле мар. Эпир вĕсене атте-анне вырăнне хурса хисеплетпĕр. Пире вĕсем канашпа, ĕçпе пулăшма тăрăшаççĕ. Савăнăçа, хуйха яланах вĕсемпе пайлатпăр, – тет В. Кондратьевăн мăшăрĕ Нина Ивановна.
Çамрăклăх – хăналăх, теççĕ. Çав кĕске вăхăтра та иртĕнсе çÿремен В.Кондратьев. Ĕмĕре пĕччен утса тухма çăмăл маррине тата сумсăррине асра тытса 1996 çулта Пÿртлĕ хĕрĕпе пĕрлешнĕ. Нина та йышлă ачаллă çемьере çитĕннĕ, пĕчĕкренех ĕçре пиçĕхнĕ.
Мăшăрланнине ĕнентерсе Мендельсон маршĕ янăранă чух каччă – 21, хĕр 20 çулта пулнă. Кăçалхипе 13-мĕш çул вĕсем çемье сукмакĕпе утаççĕ.
Çемьеленсенех Василийпа Нина тĕп килте пурăнма тытăнаççĕ. Кĕçĕнни тата пуррине шута илсе çĕнĕ план вырăнне илеççĕ, унтан кашни пуса перекетлесе хуралтăсем валли строительство материалĕсем туянма тытăнаççĕ. Ĕç укçине кăна шанмалли çук, çавăнпа пахча тулли кишĕр-чĕкĕнтĕр акнă, выльăх-чĕрлĕх усранă. Çапла туса илнĕ продукцие сутса вите, пĕчĕк пÿрт, мунча купалаççĕ. 2004 çулта пысăк çуртăн никĕсне яраççĕ, икĕ хутлă çурт хăпартса лартаççĕ. Унччен маларах мăшăр кашни ялта хăйсен кăмăлне каякан пÿрт пăхаççĕ. Патăрьелĕнче курни вара иккĕшне те килĕшет, шăпах çавăн пек купалаççĕ те.
Ялта ĕçлесе илнĕ укçапа кăна çурта хута яма май çуккипе кил хуçи Мускава стройкăсене çÿреме тытăнать. Пĕчĕккĕн-пĕчĕккĕн пÿрте шалтан та тирпейлеççĕ. Патшалăх каялла памалла мар панă субсиди те пĕр пысăк «шăтăкне» саплама çитет.
Василий Петрович хĕллехи пушă вăхăтра ахаль лармасть, çурт ăш-чиккине хăтлăх кĕртессишĕн тăрмашать.
– Çынна тара тытса ĕçлеттермен, мăшăрăм веçех хăй тунă. Алли ылтăн унăн, кашни япалана тытса пурнăçлать. Çитменнине пур ĕçе тĕплĕн тунине юратать, – тет Нина Ивановна.
Вăхăт пĕр вĕçĕм шăвать, кун хыççăн кун сисĕнмесĕрех иртет. Василийĕн шăллĕ те ÿссе çитсе каччă шутне кĕрет, мăшăрланать. Çамрăксене тĕп киле хăварса Василий Петровичпа Нина Ивановна хăйсем тунă пĕчĕк çурта пурăнма куçаççĕ. Кунта та виçĕ çул пурăнаççĕ.
Кăçал пысăк çуртне ăшă пăрăхсене кĕртнĕ. Укçи чылай кирлĕ çав, ăшă системине хута яма кăна 100 пин тенке яхăн тухса кайнă! Калама кăна вĕт... Халь Кондратьевсем кĕр мăнтăрĕпе çĕнĕ пÿрте куçма хатĕрленеççĕ.
– Ачасем, Кристинăпа Сергей, хăвăртрах çĕнĕ çурта пурăнма куçасшăн. Хăйсен япалисене пĕчĕккĕн-пĕчĕккĕн илсе каçса хураççĕ, – тет Н. Кондратьева пÿртпе паллаштарса çÿренĕ май. Икĕ хутлă, тăпăл-тăпăл çурт, кашни валли вырăн çитет. Тинех Кондратьевсен те ĕмĕчĕ тулчĕ. Шалти ĕçсене вĕçлесе пĕтереймен-ха, анчах нумай юлман.
– Хамăр тунă çуртра ачасемпе савăнса пурăнма, вĕсене ÿстерсе çын тума Турă кăна сывлăх патăрччĕ, – тет Н. Кондратьева. Çапла пултăрччĕ!
О. Павлова.