24 октября 2009 г.
Кăçалхи 9 уйăхра районта 31 пушар тухнă, вĕсенче 1421716 тенкĕлĕх пурлăх кĕлленнĕ. Вунă çурт пĕтĕмпех çуннă, 14 сиенленнĕ, 5 çын пурнăçĕ татăлнă.
Пушарсен сăлтавĕсене тишкерни çакна кăтартрĕ: инкек ытларах чухне электрооборудованипе тĕрĕс мар усă курнипе (15), вут-çулăмпа асăрханманнипе (10), юсавсăр кăмака хутнипе (2) пулать. 31 пушартан 25-шĕ уйрăм хуçалăхсенче алхаснă. Пушарсем Патăрьел, Çĕнĕ Ахпÿрт ял поселенийĕсенче (5-шер) ытларах пулнă. Çĕньял ял поселенийĕнче 4, Туçа ял поселенийĕнче 3 пушар тухнă.
Çанталăк хĕл енне кайрĕ. Çавна май кăмакасемпе усă курасси ÿсет. Газ кĕртнĕ хыççăн кăмакасем пирки сисĕмлĕх, тимлĕх чакрĕ. Электроприборсемпе усă курнă чухне те çавăн евĕрлех. Çак кăлтăксем инкек-синкек патне илсе ан пыччăр тесен кăмакасене, электроприборсене тĕрĕслесех тăмалла. Электропроводкăсен юсавлăхне электриксене пăхтармалла.
Хăш-пĕр хуçалăхра кил хуçисем çурчĕсене е выльăх витисене ăшăтма хăйсем тĕллĕн электроприборсем ăсталаса е юсавсăррисене лартаççĕ. Çуртри е мунчари кăмакасене ытлашши вăйлă хутса нуша тÿсекенсем те пур.
Çуртри кăмака-каланккăна хĕл лариччен юсамалла, хăрăмне тасатмалла, çăварĕ умне урайне хĕçтимĕр листи çапмалла. Пушар сÿнтермелли хатĕрсем алă айĕнче пулччăр тесе тăрăшмалла.
Хамăр асăрхануллă тата тимлĕ пулсан çеç инкекрен сыхланма пулĕ.
В. ЯКОВЛЕВ,
пушар инспекцийĕн начальникĕ.
Н. СЕЛИВАНОВА,
пушар хуралĕн инструкторĕ.