28 октября 2009 г.
«Ÿркев – ÿкерет, ĕç чапа кăларать» тесе ваттисем ахальтен каламан ĕнтĕ. Хăйне шаннă тивĕçе чунтан юратса пурнăçлакан хисеплĕ ят хуть ăçта вăй хурсан та çĕнсе илет. Çакна çирĕплетекен тĕслĕхсем туллиех. Паян вара ман сăмахăм Алманчăра пурăнакан А. Чихин пирки. Александрпа 6 çул каялла, ЧР Президенчĕ пултаруллă та маттур çамрăксене паракан стипендие вăл тивĕçнĕ чух паллашнăччĕ. Ун чухнех техникăна лайăх пĕлнипе, ял хуçалăхĕнчи йывăрлăхсем пирки тĕплĕн шухăшланипе палăрнăччĕ. Кăçал Александр Николаевич тĕш-тырă пуçтарса кĕртессипе республика чемпионĕ ятне çĕнсе илнипе чапа тухрĕ. Чăннипех те хăйĕн профессине чунтан юратнине ĕçпе çирĕплетрĕ. Ахальтен мар ĕнтĕ вăл механизаторсен йăхне тăсаканĕ. Чихинсем трактор-комбайн рулĕ умĕнчи ĕç стажĕ 100 çул ытла. Техникăна пĕрремĕш парăнтараканни Сашăн асламăшĕ Феодосия Андреевна пулнă.
Тăван çĕр-шывăн Аслă вăрçи пуçлансан Алманчăра та, ытти чылай çĕрти пекех, арçынсен алли çитменни пур çĕрте те туйăннă. 1942 çулта ялти 5 хĕре, вĕсем хушшинче Ф.Чихинăна та, Патăрьелĕнчи МТС-а тракторпа çÿреме вĕренме яраççĕ. Виçĕ эрнерен каялла таврăнаççĕ те кабинăсăр, тимĕр кустăрмаллă «хурçă утпа» сухалама тытăнаççĕ. Фарăсем çуккипе çĕрле хунар çутса çĕре хуратнă. Вăрçă вĕçленсен, арçынсем каялла таврăнма тытăнсан тин Феодосия Андреевна «хурçă утпа» сыв пуллашать. Анчах унăн ывăлĕсем – Виталий, Николай, Петр – амăшĕн ĕçне малалла тăсаççĕ, кайран мăнукĕсем те çав çулпах утаççĕ.
Ача чухне Сашăна асламăшĕ юмах вырăнне хăйĕн пурнăçĕ, тракторпа мĕнле сухаланисене каласа панă. Ашшĕ ывăлне час-часах хăйĕнпе пĕрле илсе çÿренĕ, руль умне лартса кăтартнă. Пĕчĕклех техникăпа туслашнăскер, шкултан вĕренсе тухсан та малашлăхне унпах çыхăнтарнă. Çитменнине ашшĕ «хурçă утăн» вăрттăнлăхĕсене алла илме пулăшнă. Руль умĕнче 37 çул ларнă арçын трактора питĕ лайăх пĕлни каламасăрах паллă. Халĕ Николай Андреевич Ленин ячĕллĕ агрофирмăра слесарьте тăрăшать.
Шкултан вĕренсе тухнине çирĕплетекен аттестат илнĕ хыççăн А. Чихин Ленин ячĕллĕ агрофирмăра трактористра ĕçлеме пуçăнать. Салтакран таврăнсан та тăван ялĕн ытамĕнчен тухас темен, çăкăр хуçиех пулас шухăша ĕçпе çирĕплетнĕ.
Çĕнĕ техникăпа ĕçлеме пĕлÿ çирĕпрех тата анлăрах кирлине те Саша ăнланнă. Çĕрпÿри ял хуçалăх техникумне вĕренме кĕрет, 2007 çулта диплом илет.
Маттур çамрăка коллективра часах асăрхаççĕ. 2001 çулта Сашăна Ленин ячĕллĕ агрофирмăн машина паркĕн гараж заведующийĕ пулма шанаççĕ. 2003-мĕшĕнче республика Президенчĕ паракан стипендие илме тивĕçет. 2006 çулта республикăри комбайнерсем хушшинче тырпул пухса кĕртессипе иккĕмĕш вырăн йышăнать. Кăçал вара Ш. Куликов фермер хуçалăхĕчи КЗС –1218 «Палессе» комбайнпа районта кăна мар, Чăваш Енре чи тухăçлă ĕçлекенни вăл пулнă.
Çитĕнÿ пĕр-пĕччен тăрăшнипе пулмасть. Александр Николаевича мăшăрĕ тата Станиславпа Алексей ывăлĕсем, ашшĕпе амăшĕ хавхалантарса тăраççĕ. Час-часах вĕсем çемйипех ял тăрăхĕнче, районта, республикăра иртекен конкурссене хутшăнаççĕ. 2008 çулта Чихинсем районта йĕркеленĕ «Çулталăк çемйи» конкурсра хăйсен пултарулăхне кăтартнă, «Чи ĕçлĕхлĕ çемье» номинацинче çĕнтернĕ. Çавăн пекех çамрăк çемьесем хушшинче йĕркеленĕ видеороликсен конкурсĕнче «Чи лайăх туй историйĕ» номинацире палăрнă. Республика шайĕнче ирттернĕ конкурсран Кубок тата III степеньлĕ дипломпа таврăннă. Çитĕнĕвĕсене асăнса пĕтерме те çук. Александрăн хăйне лайăх ĕçленĕшĕн хуçалăх, район пуçлăхĕ панă Хисеп хучĕсем те вĕсен хушшинчех.
Çуллен комбайн штурвалĕ умĕнче ларнă чух А. Чихин чун киленĕçне тупать. Савăнма та сăлтав пур: хир пушанать, тырă пÿлмене кĕрет. Пурнăç малалла тăсăлать, çитĕнÿсем тума çĕр хăйĕн вăйне парсах тăрать.
(Хамăр корр.)