28 октября 2009 г.
Районти ведомствăра тăман хурал пайне 1968 çулхи август уйăхĕнче йĕркеленĕ. 41 çул хушшинче организаци, предприяти, банк, лавкка, киоск, уйрăм кил-çурт, гараж, сейф... пуянлăхне сыхлас енĕпе тимлĕхе ÿстерсех пыраççĕ кунти ĕçченсем. Мула хапсăнакансем тĕл пулмаççĕ мар. Акă, августăн 30-мĕшĕнче çул çитмен 5 ача Патăрьелĕнчи «Дружба» урамĕнчи «Товары по оптовым ценам» лавккана çаратма пуçланă. Çакна ведомствăра тăман хурал пайĕнчи ĕçченсем çийĕнчех сиснĕ. А. Никитина диспетчер В. Кошкинпа А. Филиппов дежурнăй милиционерсене пĕлтернĕ. Вăрлас çул çине тăнăскерсене районти шалти ĕçсен пайĕн сотрудникĕсемпе пĕрле тытса чарнă.
Районти ведомствăра тăман хурал пайĕ 2005 çулхи март уйăхĕнче Канашпа пĕрлешнĕ. Пысăк йышпа ĕç кăткăслăхĕсене алла илме те меллĕ иккен. Вĕрентÿ занятийĕсене сиктермеççĕ Патăрьелсем. «Професси енĕпе чи лайăххине» палăртакан конкурссене хутшăнаççĕ. Унта, волейбол, футбол вăййисенче малти вырăнсене йышăнаççĕ. Тĕл пеме, чупма, спортăн ытти енĕпе ăста вĕсем.
Хурал пайĕн ĕçченĕсем пултаруллă пулнинче Владислав Мышов ертÿçĕ тÿпи пысăк. Кунти ĕçченсене пурнăç таппипе ĕçлесе пыма Канашри ведомствăра тăман хурал пайĕн начальникĕ В. Муллин, унăн çумĕ С. Алексеев, тĕп бухгалтер Р. Хамдеева вĕрентсе пыраççĕ.
Ĕç ăнăçлăхĕ – кадрсенче. В. Анюров централизациленĕ хурал пульчĕн дежурнăйĕ, В. Кошкин, А. Сорокин, И. Ершов, А. Филиппов милиционерсем нумай çул ĕçлесе ырă енĕпе çеç палăраççĕ. Л. Ширтановпа Л. Камышев ĕçри оборудованисене юсавлă тытса тăма тăрăшаççĕ. Л. Портнова, И. Тарасова, А. Никитина, Е. Плешкова, А. Лепешкина диспетчерсен ĕç стажĕ пысăк. Ĕçе тирпейлĕ туса пыраççĕ вĕсем.
Пĕр тикĕс аталанса пыракан обществăра çын япалине куç хывакан та пулмалла мар пек. Анчах ăнланулăх пĕр шайра тăмасть пурин те. Çавăнпа йĕркене пăсакансем тупăнаççех. Ведомствăра тăман хуралпа çыхăнакансен вара шиклĕх çук пĕрре те. Çак системăра ĕçлекенсен професси уявĕ ыран. Çак ятпа саламласа вĕсене ĕçре çитĕнÿ, пурнăçра çирĕп сывлăх, ăнăçусем сунатпăр. (2019).
А. Васильева.