31 октября 2009 г.
Чăваш Республикин Президенчĕн Кубокĕшĕн шкул ачисем хушшинче пыракан ХII спартакиада программипе килĕшÿллĕн, Шăмăршăра баскетболла выляссипе зонăри ăмăрту иртрĕ. Унта Елчĕк, Комсомольски, Патăрьел, Шăмăршă районĕсенчи çамрăк баскетболисткăсем тупăшрĕç. Çивĕч кĕрешÿре пирĕн районăн Патăрьелĕнчи 1-мĕш вăтам шкулăн тата Туçари вĕрентÿ центрĕн спортсменкисенчен йĕркеленĕ команди иккĕмĕш вырăн йышăнчĕ, малаллахи ăмăртусене хутшăнма ирĕк çĕнсе илчĕ.
А. Афанасьев.
Патăрьелĕнчи "Паттăр" физкультурăпа спорт комплексĕнче шкул ачисен спартакиади шучĕпе теннис ăмăртăвĕ иртрĕ. Унта тĕп тата вăтам шкулсенчи теннис тусĕсем уйрăмшарăн тата командăпа мала тухассишĕн вăй виçрĕç. Турнира вăтам шкулсен 10, тĕп шкулсен 5 команди хутшăнчĕ.
Вăтам шкулсен ушкăнĕнче Алманчăсем çĕнтерчĕç, вĕсем хыçĕнче – Первомайскисем, виççĕмĕш вырăнта – Аслă Чеменсем. Тĕп шкулсен ушкăнĕнче Кзыл Чишмасем чи маттурри пулчĕç, Кивĕ Ахпÿрт шкулĕ иккĕмĕш вырăнта, Шăхачсем – виççĕмĕшĕнче.
Уйрăм теннисистсем хушшинче Р. Быков (Алманчă) пĕрремĕш, çак шкулти А. Зимин иккĕмĕш, Нăрваш Шăхаль шкулĕнчи А. Кудряшов виççĕмĕш вырăн йышăнчĕç.
Хĕрачасенчен Ю. Плешкова (Туçа) çĕнтерчĕ. Ун хыççăнхи вырăнсенче Т. Калькина (Сăкăт), Л. Шамсутдинова (Шăнкăртамри 1-мĕш шкул).
Патăрьелĕнчи ачасемпе çамрăксен спорт шкулĕнче велосипедпа чупса мала тухассишĕн Нăрваш Шăхалĕнче ăмăрту иртрĕ. Ăна çамрăк велосипедиста Сергей Тукмакова асăнса йĕркелерĕç. Дистанцисенче 50 ытла çамрăк велосипедист вăй виçрĕ. Хăйсен çулĕсене кура туса хунă ушкăнсенче Нăрваш Шăхалĕнчи Н. Михайлова, С. Михайлова, А. Михайлова, Т. Раськин, Турхан шкулĕнчи С. Осипов, А. Осипов, М. Емельянов çĕнтерчĕç.
А. Алексеев.