03 ноября 2009 г.
Физкультурăпа спорт комплексĕнче шкул ачисен Спартакиадипе килĕшÿллĕн сĕтел çинче теннисла выляссипе ăмăртусем пулса иртрĕç. «Пинг-понг» вăййине пурĕ вун пилĕк команда (вуннăшĕ вăтам шкулсем) пуçтарăнчĕç. Малтан çамрăк теннисистсем тупăшрĕç. Командăра икĕ арçын ачапа пĕр хĕр ача. Пĕрремĕш «А» ушкăнри командăсенчен çивĕч кĕрешÿре Алманчăри вăтам шкул команди çĕнтерчĕ. Иккĕмĕшпе виççĕмĕш вырăнсенче Аслă Чементи вăтам шкул тата Туçари вĕрентÿ центрĕн командисем. «Б» ушкăнра чи пултарулли Первомайскинчи вăтам шкул команди пулчĕ. Иккĕмĕшĕнче Нăрваш Шăхаль шкул команди, виççĕмĕшĕнче Шăнкăртамри пĕрремĕш номерлĕ вăтам шкул команди. Малалла вĕсем икĕ ушкăнри командăсем пĕр-пĕринпе выляса çĕнтерÿçе палăртрĕç. Спартакиада чемпионĕн ятне Алманчăри вăтам шкул команди тивĕçрĕ. Иккĕмĕш вырăнта Первомайскисем пулчĕç, виççĕмĕшĕнче Аслă Чеменсем. Тĕп шкулсен командисенчен çивĕч тупăшура Кзыл Чишмари шкул команди çĕнтерчĕ. Иккĕмĕшĕнче Кивĕ Ахпÿрт, виççĕмĕш вырăнта Шăхач шкул командисем пулчĕç. Тепĕр тапхăрта теннисистсем уйрăмшарăн ăмăртрĕç. Шăпа янă хыççăн сĕтелсем çинче çивĕч тупăшусем пуçланчĕç. Çĕнтернисем малалла, çĕнтерейменнисем каялла кайса пычĕç. Арçын ачасенчен чи пултарулли Руслан Быков (Алманчă) пулчĕ. Вăл Спартакиада чемпионĕ. Руслан юлташĕ Саша Зимин иккĕмĕш вырăнта, виççĕмĕшĕнче вара Андрей Кудряшов (Нăр-ваш Шăхаль) пулчĕ. Хĕр ачасен хушшинче те çивĕч тупăшу пычĕ. «Пинг-понг» вăйă çĕнтерÿçи – Юлия Плешкова (Туçа). Ун хыççăн иккĕмĕш картлашкара Таня Калькина (Сăкăт), виççĕмĕшĕнче – Лейля Шамсутдинова (Шăнкăртамри пĕрремĕш вăтам шкул). Уйрăм çĕнтерÿçĕсемпе призлă вырăнсене йышăннă спортсменсене тата командăсене ятарлă дипломсемпе грамотăсем парса хавхалантарчĕç.
В. БОРОДКИН.