07 ноября 2009 г.
Алманчăри вăтам шкул – районти чи ваттисенчен пĕри – хăй 120 çул тултарнине паллă турĕ.
Юбилей ячĕпе тăван шкула тĕрлĕ вăхăтра пĕлÿ илнисем, хăнасем йышлăн пуçтарăнчĕç. Шкул çак кун нихçанхинчен илемленчĕ.
Савăнăçлă пай спортзалра иртрĕ. Шкул коллективне Патăрьел район пуçлăхĕ Н. Глухов, Алманчă ял поселенийĕн пуçлăхĕ Г. Фомин, «Ленин ячĕллĕ çĕр ĕç фирми» пĕрлешĕвĕн гендиректорĕ Ю. Попов тата ыттисем те саламларĕç. Н. Глухов шкула мечĕксем парнелерĕ.
А. Дружинин, Р. Васильева, А. Киргизова, В. Васильев, Л. Горбунова, З. Мышова, А. Салимгереев, М. Абдуллин, В. Хадарова хăйсен аса илĕвĕсемпе паллаштарни кăсăклă пулчĕ.
Шкул историйĕпе, унăн аталану тапхă-рĕсемпе шкул директорĕ М. Горбунова паллаштарчĕ, экранра кăтартса пычĕ. 1953-2008 çулсенчи выпускниксен сăн ÿкерчĕкĕсенчен йĕркеленĕ слайд-шоу пурне те кăмăла кайрĕ, хумхантарчĕ, аса илÿсем çуратрĕ.
Шкул пĕтернисем хушшинче паллă ученăйсем, спортсменсем, инженерсем, педагогсем, тĕрлĕ сферăра тава тивĕçлĕ ят илнисем, орденсемпе медальсен кавалерĕсем йышлă. Вĕсем шкул ятне çÿле çĕклерĕç. Шкула медальсемпе пĕтерекенсен йышĕ хутшăнсах пыни кунти вĕрентÿпе воспитани ĕçĕн шайĕ педагогсен пултарулăхне кăтартать.
Савăнăçлă лару учительсемпе вĕренекенсен паха концерчĕпе вĕçленчĕ.
(Хамăр корр.).