28 ноября 2009 г.
Вырма вĕçленнĕ хыççăн çĕр ĕçченĕшĕн канăçсăр вăхăт иртнĕ темелле пек.Тĕрĕссипе вара хуçалăхсенче тыр-пула пуçтарса кĕртсенех çĕнĕ тухăç пирки ĕçлеме пикенеççĕ .»Первомайск» хуçалăхра ял хуçалăх культурисен лаптăкĕсене пуçтарса тирпейленĕ хыççăн механизаторсем 700 гектар ытла çĕре сухаласа хăварнă.Хыт-хура пуснă çĕр лаптăкĕ юлман. Çитес çул акма-лартма çирĕп никĕс валли çĕр хатĕр темелле.
Хальхи вăхăтра хуçалăхра вăрлăхсене алласа кирлĕ кондицие лартма пикеннĕ. Куллен 8-10 хĕрарăм 4-5 тонна вăрлăх тасатать. Чăн малтан урпана тасатма пуçăннă. Ĕçлемелли сахалах мар: мĕн пурĕ 150 тонна вăрлăха алламалла. Çакă акмалли фондран чылай ытлашши, сутлăх та пур.
Хуçалăхăн тĕп агрономĕ И.Киргизов пĕлтернĕ тăрăх, çулсеренех вăрлăха çĕнетсе пыраççĕ. Çакă вара пысăк тухăç илме май парать. Кăçал та Первомайскисем гектартан 27 центнер ытла тĕш-тырă туса илнĕ. Уйрăм культурăсенчен урпа аллă центнер ытла тухнă. Вăрлăхпа, удобренипе ĕçленин, пусăçаврăнăшне пăхăннин усси пурах.
А.НИКОЛАЕВА.