16 декабря 2009 г.
Патăрьел районĕн ятне çĕклес, культурăна аталантарма çĕнĕлĕхсем кĕртес, ял поселенийĕсене, предприятисемпе организацисене урамри çутă системине çĕнетме, территорисене тирпей-илем кĕртессине çĕнĕлле пăхма хавхалантарас тĕллевпе район пуçлăхĕ Н. Глухов районта çулсеренех «Да будет свет!» конкурс ирттересси пирки йышăну кăларнă. Çав йышăнупах конкурс положенине, 5 çынран йĕркелÿ комиссине çи-рĕплетнĕ. Комитета район пуçлăхĕн пĕрремĕш çумĕ Р. Селиванов ертсе пырать.
Конкурс тĕллевĕ – обществăлла инфратытăма малалла аталантарас, урамри çутă сетьне çĕнетес тата çĕнĕрен тăвас, территорисене, çурт-йĕре, уйрăм çын хуçалăхне тирпей-илем кĕртес тата çутăпа эстетика тĕлĕшĕнчен илемлетес енĕпе чи лайăх кăтарту тунă ял поселенийĕсене, предприятисемпе организацисене, уйрăм предпринимательсене, уйрăм çынсене палăртасси.
Конкурса кашни çул ирттереççĕ. Ăна йĕркелекенĕ – Патăрьел райадминистрацийĕ.
Конкурса икĕ ушкăнпа пĕтĕмлетеççĕ:
1-мĕш ушкăн – предприятисемпе организацисем, уйрăм предпринимательсем;
2-мĕш ушкăн – уйрăм çынсем.
Конкурса хутшăнас текенсен заявкăсене декабрĕн 25-мĕшĕнчен кая юлмасăр тăратмалла.
Конкурс итогĕсене 2010 çулхи январĕн 12-мĕшĕ тĕлне пĕтĕмлетеççĕ.
Материалсене номинацисем тăрăх хатĕрлесе оргкомитета ял поселенийĕсем тăратаççĕ.
Материалсенче ăнлантарса çырни, иллюстрацисем, сăн ÿкерчĕксем, видеоçыравсем пулмалла. Вĕсем инфратытăм объекчĕсене, урамсене тирпей-илем кĕртнине тата çутатнине, çурт-йĕре çутăпа илемлетнине сăнласа памалла.
Çĕнтерÿçĕсене Хисеп хучĕсемпе, хаклă парнесемпе чыслаççĕ.