16 января 2010 г.
Мускавран савăнăçлă хыпар çитнĕ: РФ Правительствин агропромышленность ыйтăвĕсемпе ĕçлекен комиссийĕ «Ялăн 2010 çулчченхи социаллă пурнăç аталанăвĕ» тĕллевлĕ программа епле пурнăçланнине пĕтĕмлетнĕ. Чăваш Ен 2003-2009 çулсенче ялсенче çурт-йĕр тăвассипе регионсен хушшинче 1-мĕш вырăн йышăннă. Çичĕ çулта 2059 пин тăваткал метр çурт хута янă (Тутарстанран 3,6 хут нумайрах!). Чăваш строителĕсем Пушкăртстана, Белгородпа Оренбург облаçĕсене самай кая хăварнă.
Пирĕн республика çут çанталăк газĕ кĕртессипе те малта. 2003-2009 çулсенче 6607,4 километр газ пăрăхĕ хывнă (Мускав облаçĕнчен 3,7 хут ытларах!). Тамбов, Оренбург облаçĕсен, Пушкăрт Республикин кăтартă-вĕсем чылай пĕчĕк: 3615,9; 3147,1; 1911,6.
Вырăнта шыв пăрăхĕ хывассипе – тăваттăмĕш вырăнта. Чăваш Енрен Тутарстан, Саха (Якути) тата Пушкăртстан çеç иртме пултарнă.