30 января 2010 г.
«Чувашавтодор» предприятийĕн, Патăрьел ял поселенийĕн, райадминистрацин, ГИБДД уйрăмĕн представителĕсенчен йĕркеленĕ комисси январьте районти автоçулсене тишкерсе тухрĕ, чылай кăлтăксене палăртрĕ. Халăх çÿп-çапа, юра çул хĕррине е çул çинех тăкни те вĕсен шутне кĕрет. Çакă, паллах, çулпа йĕркеллĕ çÿреме кансĕрлет.
Раççей Федерацийĕн административлă Кодексĕнче 12.33 статья пур. Вăл çулсене, чукун çул урлă каçмалли вырăнсене, çÿреве йĕркелемелли техникăллă хатĕрсене сиенленĕшĕн, çула вараласа çÿреве кансĕрленĕшĕн административлă йĕркепе айăпласси çинчен калать. Ку вăл штрафланине пĕлтерет. 12.33 статьяпа килĕшÿллĕн уйрăм çынсене 300-500 тенкĕ, должноçри çынсене 500-1000 тенкĕ, юридициллĕ сăпатсене 5000-10000 тенкĕ тÿлеттереççĕ.
Çулсене упрамалла, таса тытмалла.
С. КУЗНЕЦОВ, ГИБДД уйрăмĕн инспекторĕ.