10 февраля 2010 г.
Нарăсăн 5-мĕшĕнче районти ача-пăча библиотекинче Мухтав орденĕн тулли кавалерĕ Александр Порфирьевич Табаков çуралнăранпа 90 çул çитнине халалласа паттăрлăх урокне ирттернĕ. Çак сăлтавпа вулавăш ĕçченĕсем «Эпир санпа мухтанатпăр» ятпа ветеран пурнăçĕпе, ĕçĕ-хĕлĕпе, фронтри паттăрлăхĕпе çыхăннă сăн ÿкерчĕксен, пичетленнĕ материалсен, аса илÿсен куравне йĕркеленĕ.
Мухтав орденĕн виçĕ степеньне те илме тивĕçнĕ, виçĕ хутчен Мускавра Çĕнтерÿ парадне хутшăннă хисеплĕ ветеранăмăр паян пирĕнпе юнашар çук пулин те унăн ячĕ, çутă сăнарĕ ĕмĕр-ĕмĕр упранĕ.
Паттăрлăх урокĕн вĕçĕнче библиотека ĕçченĕсемпе пĕрле ветеранăн мăнукĕн хĕрĕ Патăрьелĕнчи 1-мĕш вăтам шкулти 4-мĕш класра вĕренекен У. Бармакова хатĕрленĕ «Мухтанатăп санпа, кукаçи» электронлă презентаципе паллашнă.