10 апреля 2010 г.
Пурлăха вут-кăвартан сыхласси яланах пысăк пĕлтерĕшлĕ. Ăшă кунсем çывхарса пынă май, пушар тухас хăрушлăх пушшех пысăкланать. Çавна пула Раççей Чрезвычайлă лару-тăру министерствин Чăваш Республикинчи Тĕп управленийĕ нарăс-çу уйăхĕсенче “Пурăнмалли çурт-йĕр-2010” профилактика операцийĕ ирттерет. Патăрьелĕнчи пушар хуралĕн ĕçченĕсем те çак яваплă тапхăра хутшăнса халăхпа профилактика тата ăнлантару ĕçĕсем ирттереççĕ. Ку таранччен вĕсем районти 810 кил-çурта тĕрĕсленĕ. Çак шутра нумай ачаллă, ĕçкĕпе иртĕнекен, пĕччен пурăнакан 440 çемье. Пирĕн сотрудниксем операци тапхăрĕнче 1972 çынна пушар хуралĕн йĕркине пăхăнмаллине ăнлантарса панă, 15 кил хуçине вара вут-кăварпа çыхăннă йĕркесене тĕпе хуманран явап тыттарнă.
Пушар çулталăкăн кирек хăш вăхăтĕнче те хăрушă, синкерлĕ, нумай пурлăха пĕтерет. Çавăнпа та яланах асăрхануллă пулмалла.
Н. СЕЛИВАНОВА, пушар хуралĕн инструкторĕ.