05 мая 2010 г.
Республикăри ачасемпе çамрăксен библиотекипе Чăваш Енри социаллă тата культурăллă программăсене хÿтĕлекен фонд йĕркеленипе вĕренекенсем хушшинче “Çĕнтерÿ çинчен” темăпа творчество ĕçĕсен конкурсĕ пулнă. Ăна ачасемпе çамрăксене Тăван çĕр-шывăн Аслă вăрçин историне тарăн вĕрентес, ветерансен ятне асра тыттарас тĕллевпе йĕркеленĕ.
Конкурса пирĕн районтан та пултаруллă ачасем хутшăннă. Патăрьелĕнчи пĕрремĕш вăтам шкулти 5 “а” класри Наташа Исаева 5-8 классем хушшинче виççĕмĕш вырăн çĕнсе илме пултарнă. Вăл конкурса вăрçă участници Н.Макашина аса илĕвĕсенчен йĕркеленĕ “Вăрçă çинчен каласа паратăп...” творчество ĕçне тăратнă. Конкурс çĕнтерÿçи çакăншăн Диплома тата хаклă парнене илме тивĕçнĕ.
Çак конкурсах маларах асăннă шкулти 8 “а” класра вĕренекен А.Гаврилов та хутшăннă. Андрейăн ĕçне те пысăка хурса хакланă.