29 мая 2010 г.
Çĕр-шыври экономика лару-тăрăвĕ прокуратура органĕсенчен ĕçлекенсен прависене пăхăннине, ĕç укçипе вăхăтра тата туллин тивĕçтернине çирĕп тĕрĕслесе тăма ыйтать. Шел пулин те ĕçпе тивĕçтерекен кашни çын саккуна тĕп вырăна хумасть. Район прокуратури тĕрĕсленĕ И.Федоров индивидуаллă предприниматель те çав шута кĕнине кăтартса пачĕ.
Раççей Федерацийĕн Ĕç кодексĕн 303 статйипе килĕшÿллĕн малтанах ĕçе вырнаçаканпа килĕшÿ çырмалла, федераллă саккунпа килĕшÿллĕн тĕрлĕрен взнос укçине тÿлемелле, пĕрремĕш хут ĕçе вырнаçакансемшĕн Патшалăх пенси страховани свидетельствине,Ĕç кодексĕн 309 статйипе кашнин валли ĕç кĕнекине уçмалла. И.Федоров предприниматель шăпах çав йĕркесене пăхăнман, Патăрьелĕнчи “Бытовая химия” магазинта ĕçлекенпе те çаплах хăтланнă. Унсăр пуçне сутуçăна уйăхне 2500 тенкĕ çеç тÿленĕ. 2009 çулхи январĕн 1-мĕшĕнчен вара саккунпа килĕшÿллĕн чи пĕчĕк ĕç укçи 4330 тенкĕрен кая пулмалла мар.
Ĕç çинчен калакан саккуна пăснăшăн район прокурорĕ РФ Административлă право йĕркине пăсни çинчен калакан Кодексăн 5.27 статйин 1-мĕш пайĕпе килĕшÿллĕн ĕç пуçарнă. ЧР Патшалăх ĕç инспекцийĕн постановленийĕпе ăна штраф панă.
В.ПУТЯКОВ,
район прокурорĕн аслă пулăшуçи