29 июня 2010 г.
Республика умĕнхи каç Шăнкăртамсемшĕн синкерлĕ пулса тухнă. Каçхине çичĕ сехетре Ф. Немакаева хуçалăхне сасартăк вут хыпнă. Уяр çанталăкра типсе, хĕрсе кайнă хуралтăсем шатăртатса çеç тăнă. Инкеке парăнтарма çичĕ пушар машини çитнĕ. Унсăр пуçне ял халăхĕ те кар тухнă, май пур таран вут-çулăма парăнтарма тăрăшнă. Пушарниксем инкекре тăватă сехет кĕрешнĕ. Çапах мĕнле тăрăшсан та вут алли кÿршĕ Нигматулловсем енне те куçнă, вĕсен гаражĕпе сарайне сиенленĕ.
Пĕр кун маларах çеç вара Кĕçĕн Патăрьелĕнчи А. Цветкова хуçалăхĕнчен пушар тухнă, хуралтисене юрăхсăра кăларнă.
Çанталăк вăрах вăхăт хушши пĕр тикĕс шăрăх тăни питĕ пысăк хăрушлăх кăларса тăратать, çавăнпа та вут хыпса илсе сăтăр тăвасран пурин те асăрханмалла.