29 июня 2010 г.
Алманчăри ял библиотекинче вăтам шкул çумĕнче йĕркеленĕ ачасен çуллахи кану лагерьне çÿрекенсем Дружининсен кăтартуллă çемйипе тĕл пулнă. Мероприятие çывхарса килекен “Çемье, юрату тата шанăç” кунне халалланă.
Аркадий Андреевичпа Серафима Николаевна çитĕнекен çамрăк ăрупа тĕл пулса калаçма, ачасене пурнăç кăсăклăхĕсемпе, йывăрлăхĕсемпе паллаштарма тивĕçлех. Вĕсем çур ĕмĕр ĕнтĕ çемьере килĕштерсе, шăкăл-шăкăл калаçса пурăнаççĕ.
Çемье пуçлăхĕ 38 çул ялти шкулта рисовани, черчени, ĕç урокĕсене вĕрентнĕ. Шкул ачисемпе ашшĕ-амăшĕ, учительсем ял халăхĕ умĕнче пысăк хисеп çĕнсе илнĕ. Вăл яланах обществăлла ĕçре те чи хастаррисенчен пĕри пулнă. Мăшăрĕ вара уншăн пурнăçра пĕрремĕш пулăшакан, ăнланакан çын пулнă. Ахальтен мар ĕнтĕ вĕсене хисеплесе уяв умĕнхи тĕл пулăва чĕннĕ.