24 июля 2010 г.
“Паттăр” физкультурăпа спорт комплексĕнче Патăрьел, Елчĕк, Комсомольски, Шăмăршă районĕсенчи инвалидсем хушшинче спорт мероприятийĕ иртрĕ. Хăнасене районти социаллă хÿтлĕх пайĕн ертÿçи Ф. Майорова, Пĕтĕм Раççейри инвалидсен обществин республикăри обществăлла организацийĕн председателĕ М. Кузьминых тата районти уйрăмĕн председателĕ Н. Лепешкин кĕтсе илчĕç.
Мероприятие 18 çултан пуçласа 50 çулчченхи сусăрсем хутшăнчĕç. Ăмăртусем дартс, сĕтел çинчи теннис тата пауэрлифтинг енĕпе пулчĕç. Хĕрÿ тупăшусенче Треньелĕнчи В. Положин тенниспа виççĕмĕш, алă вăй виçессипе тата пауэрлифтингпа пĕрремĕш вырăнсене, Патăрьелĕнчи В. Ульянов алă вăй виçессипе виççĕмĕш вырăн йышăнчĕ.
Мала тухнисем республикăри обществăлла организацин дипломĕсене илчĕç, çÿлерех шайри ăмăртусене хутшăнма тивĕç пулчĕç.
(Хамăр коор.).