28 июля 2010 г.
Кун пек шăрăх 1972 çулта пулнă, теççĕ ас тăвакансем. Кăçал хĕвел çу уйăхĕн виççĕмĕш вунă кунлăхĕнчен пĕçертме тытăнчĕ те, унтанпа чарăнма та пĕлмест. Аран-аран июлĕн 18-мĕшĕнче çумăра кĕтсе илтĕмĕр. Анчах шывшăн типсе çитнĕ çĕршĕн вăл çителĕклĕ пулмарĕ. Унтанпа каллех шăрăх тăрать, пирĕн патăртан кайма шухăшламасть те пулас. Утă уйăхĕн вĕçĕчченех 35-38 градус ăшă тăмалла теççĕ метеорологсем. Çумăр çăвассин палли те çук иккен.
Сывлăш температури вĕри тăнипе пурте нушаланаççĕ. Ваттисен, чирлисен, ачасен уйрăмах асăрхануллă пулмалла, кăнтăрла питех урама тухмалла мар. Пÿлĕмсенче вентиляторсемпе, кондиционерсемпе усă курмалла. Кунне темиçе хут çăвăнмалла, сивĕ шыв ĕçмелле.