28 июля 2010 г.
Кăçал Атăл тăрăхĕнчи регионсене çуллахи шăрăх самаях пăшăрхантарать. Лартнă çĕр улмине, тĕрлĕ пахча çимĕçе туса илес шанчăк пачах çухалса пырать. Ку пулăм Ишлĕ ялĕнче те аван теме çук. Ÿсен-тăран шыв ыйтать. Урамра курăксем типсе пынăран тавралăха кĕр сăнĕ çапрĕ. Пăла, Каçал, Лявашни çырмисем пачах типсе ларчĕç.
Кун пек çанталăк 1972 çулта та пулнăччĕ. Каярах çуралнă çамрăксем çакна паллах ас тумаççĕ.
Çак çанталăк пулăмĕ ял халăхне темĕн те шутлаттарать. Хăшĕ-пĕри çитес çул та çапла пулмалла теççĕ. Çавна май Ишлĕ ялĕнче пурăнакансем çырмасенче пĕвесем тума шутларĕç. Çуркуннехи юр шывне тытса юлсан, тен, аванрах пулĕ. Çак ĕçе çамрăксен хушшинчен пĕр маттур, ĕçчен çын пуçăнчĕ те. Ял халăхĕн выльăхĕсем валли шыв пултăр тесе Хурчăка çырмине пĕвелес ĕçе çанна тавăрсах пикенчĕ.
И. ЕРОФЕЕВ.