04 августа 2010 г.
Сăкăтра çĕкленекен çĕнĕ вăтам шкул базинчи планеркăна район пуçлăхĕ Н. Глухов, Чăваш Республикин Вĕрентÿпе çамрăксен политикин министрĕн çумĕ В. Устяк, Чăваш Республикин хула тăвас ĕç тата общество инфратытăмĕн аталанăвĕн министерствин патшалăх строительство надзорĕн пай начальникĕ В. Степанов, райадминистрацин строительство тата обществăлла инфратытăм аталанăвĕн пай пуçлăхĕ И. Дикин, “Булат” тулли мар яваплă пĕрлешÿ ертÿçи Р. Абдулвалеев хутшăннă.
Шкула кăçалхи апрель уйăхĕнче тума пуçăннă. Паянхи куна виçĕ хутне те купаланă. Спортзалпа котельнăя реконструкцилес ĕçсем пыраççĕ. Вĕсене сентябрĕн 1-мĕшĕ тĕлне вĕçлесшĕн. Шкула 2011 çулхи çĕнĕ вĕренÿ çулне хута яма палăртнă. Строительство ăнăçлă пыни ăна январĕн 1-мĕшĕ тĕлне ĕçе кĕртме майсем пуррине кăтартать. Шкул валли çĕнĕ сĕтел пуканпа ку чухнехи оборудовани кÿрсе килме заказ панă.
Çавăн пекех вĕрентÿ çурчĕ çумĕнче стадион тăвасшăн.
А. ИВАНОВА.