18 августа 2010 г.
Кайăк-кĕшĕкĕн те, хурт-кăпшанкăн та хăйĕн кĕтесĕ пур. Çын та кил-çуртсăр пурăнаймасть, ĕмĕр тăршшĕпех ăна çĕнетессишĕн тăрăшать. Районта 7 уйăхра 10810 тăваткал метр пурăнмалли çурт-йĕр хута кайнă. Пĕлтĕрхи çак тапхăрпа танлаштарсан 7 процент чухлĕ нумайрах.
2010 çулта, “Ялăн 2012 çулчченхи социаллă аталанăвĕ” федераллă тĕллевлĕ программăпа килĕшÿллĕн, пирĕн районта патшалăх паракан 7 миллион та 400 пин тенке ĕçе кĕртмелле. Вăл шутран граждансен çурт-йĕрне ла-йăхлатма 3 миллион та 550 пин тенкĕ, çамрăк специалистсене кĕтеслĕ пулма 3 миллион та 850 пин тенкĕ уйăрнă.
Августăн 5-мĕшĕ тĕлне асăннă программăпа паракан пулăшупа ялта пурăнакан 12 çын 2 миллион та 925 тенкĕлĕх усă курса хăйсен çуртне тирпейленĕ. Çамрăк 8 специалист тата вĕсен çемйи пурĕ 3 миллион та 289 пин те 800 тенкĕ илнĕ. Программа пурнăçа кĕме тытăннăранпа, 2003 çултанпа, районти 268 çемье çурт-йĕр условине лайăхлатнă.
Нумай ачаллă, (5 е ытларах çул çитмен ача пулсан), çемьесене кĕтеспе тивĕçтерессипе те районта индивидуаллă виçĕ çурт тума тытăннă. Çак ĕçсене пурнăçа кĕртме 5 миллион та 321 пин те 500 тенкĕ уйăрнă. Çавăн пекех тăлăх ачасене хваттерлĕ тăвас ыйтупа та тимлеççĕ.
“Кивĕ тата авариллĕ лару-тăрури çуртран куçарасси” программăпа килĕшÿллĕн кăçал 6 çемье çĕнĕ хваттерсене пурăнма куçмалла. Çуртăн пĕтĕмĕшле лаптăкĕ 268,3 тăваткал метрпа танлашать.
Раççей Федерацийĕн Президенчĕн Хушăвĕпе килĕшÿллĕн Тăван çĕр-шывăн Аслă вăрçине хутшăннă ветерансене çурт-йĕрпе тивĕçтерес тĕллевпе ял поселенийĕн администрацийĕсем пурăнмалли лаптăк çитменнипе нушаланакан 141 ветеранпа ветерансен тăлăх арăмĕсене шута илнĕ. Кĕтес туянма е çĕннине тума 76 свидетельство панă. Паяна хваттер илме – 50, нумай хваттерлĕ çуртра пая кĕме – 18, индивидуаллă çурт тума 4 килĕшÿ çырнă.
(Хамăр корр.).